«Спортивные Якутяне» үөрэнээччилэр спартакиадаларыгар Нам улууһун волейболга хамаандата бүгүн түмүктүүр оонньуууга кыайыыны ситиһэн чөмпүйүөн үрдүк аатын ылла. Тренердэр – Айсен Жерготов, Тимур Константинов. Эдэр волейболистар бөлөхтөрүгэр финалга Тааттаны кытары кииристилэр. Бастакы партияны 25-15-кэ, иккиһи 28-26-ҕа түмүктээтилэр. Онон уопсай зачет 2-0 Нам улууһун хамаандатыгар буолла. Нам 1-кы, 2-с Таатта, 3-с Чурапчы, 4-с Дьокуускай миэстэҕэ таҕыстылар.
Айсен Жерготов, Нам улууһун волейболга хамаандатын тренерэ:
«Спортивные Якутяне» үөрэнээччилэр спартакиадалара түмүктэннэ. Биһиги волейболга эрэллээхтик кыайдыбыт. Чурапчы, Мирнэй, Сунтаар, Дьокуускай, Таатта хамаандаларын барыларын 2:0 ахсаанынан хоттубут.
Бастатан туран, тренердэр үчүгэй, таһаарыылаах үлэлэрин бэлиэтиибин. Бары билэҕит, мин Намтан көһөн барбытым, ол эрээри үс волейболист уолу куоракка бэйэм илдьэ сылдьан эрчийэбин. Хамаанда улахан аҥаара Намҥа эрчиллэр.
Оҕо спортивнай оскуолата биир хамаанда курдук түмсүүлээхтик үлэлээн маннык улахан түмүктэр кэллилэр. Бу сылга өрөспүүбүлүкэҕэ бастыыр иһин 3 күрэхтэһии буолла. Онуоха, «Спортивные Якутяне» үөрэнээччилэр спартакиадалара төрдүс оонньуу буолар. Манна 4-тэн 3-гэр бастаатыбыт, биир оонньууга 2-с. миэстэ буолбуппут. Онон волейбол Намҥа күүстээҕин өссө төгүл дакаастаатыбыт.
Төрөппүттэргэ, оскуола коллективыгар, Нам дьонугар-сэргэтигэр, волейбол федерациятыгар, улуус салалтатыгар, чуолаан, Юрий Слепцовка оҕо спордун өйүүллэрин иһин махталбын тиэрдэбин. Бэлиэтээн эттэххэ, бүгүн 2 автобус «ыалдьааччы» кэлэн өйөөннөр эрэллээхтик кыайдыбыт. Манна улууска волейбол федерациятын председателэ Филипп Николаев үлэтэ көстөр. «Ыалдьааччылары» аҕалан өйүөххэ диэн кини идеята буолар.
Бу спартакиада оҕолорго саамай улахан күрэхтэһиилэртэн биирдэстэрэ. Онон историяҕа хаалар биир бэлиэтэнэр кыайыы кэллэ. Сотору кэминэн «Азия оҕолоро» оонньуу буолуоҕа. Намтан 7 уол өрөспүүбүлүкэ сүүмэрдэммит хамаандатыгар киирэн эрчиллэ сылдьаллар. Бу курдук үлэ тохтообокко салҕанар.
Лена Ноговицына
