Нам улууһун Аппааны бөһүөлэгин түөрт оҕолоох: үс кыыс, биир уоллаах эдэр ыаллара Мария Федоровна уонна Радомир Радомирович Осиповтар ахсынньы 15 күнүгэр 2023 сылга кырачаан кыыстара Сандаара Дьокуускайга күн сирин көрөн, СӨ 11 тыһ. регистрацияламмыт олохтоох аатын сүктэ.
Мариялаах Радомир 2015 сыллаахха Уус Алданнааҕы техникумҥа “Техник спасатель ЧС” идэтигэр үөрэнэн 2019 сыллаахха бүтэрбиттэрэ. Ахсынньы 3 күнүгэр 2018 сыллаахха ыал буолбуттара.
Тохсунньу 19 күнүгэр «Чороон» норуот айымньытын киинигэр «Сыл бастыҥнара-2023» тэрээһиҥҥэ Осиповтар дьиэ кэргэттэригэр СӨ Үлэ уонна социальнай сайдыы миниистирин Е.А. Волкова 11 тыһ. регистрация сибидиэтилистибэтин, СӨ Ил Дархана А.С. Николаев «Дети столетия» тус сыаллаах хапытаалын туттардылар. Ону тэҥэ, «Хатыҥ Арыы нэһилиэгэ» МТ баһылыгын «Сыл оҕото» анал аатын туттулар.
Осиповтар дьиэ кэргэттэригэр чэгиэн-чэбдик дуруобуйаны, этэҥҥэ буолууну, байылыат олоҕу баҕарабыт!
Надежда Сивцева