Нам улуустааҕы гимназиятын үөрэнээччилэригэр балаҕан ыйын 15 күнүгэр үлэ күнэ биллэрилиннэ.
Ол курдук, Н.С. Охлопков аат. улуустааҕы гимназияҕа бүгүн туһалаах үлэ күнэ буолан ааста. Бу тэрээһин үөрэнээччи үлэни таптыырыгар, үлэ сүрүн үөрүйэхтэрин билэргэ, үөскэтэргэ көмөлөһөр.
3-4 кылаас үөрэнээччилэрэ П.И. Сивцев аат. история уонна этнография музейыгар сырыттылар.
Оттон орто уонна үрдүкү кылаастар Бөтүҥ нэһилиэгэр хортуоппуй үлэтигэр көхтөөх кыттыыны ыллылар. Ону тэҥэ, гимназия тас өттүн, Доҕордоһуу болуоссатын хомуйдулар, ыраастаатылар.
7 “б” кылаас оҕолоро гимназия ветеран-педагогугар Николай Тимофеевичка хортуоска хомуйуутугар көмөлөстүлэр. Оттон 9 “б” кылаас үөрэнээччилэрэ биология учуутала Бочкарева Елена Владимировнаны кытта мас көрүүтүнэн-истиитинэн дьарыктаммыттара.
10 “а” уонна 10 “б” кылаастар байыаннай дьайыы кыттыылааҕын дьиэ кэргэнигэр, ону таһынан, көмөҕө наадыйар төрөппүккэ тимуровскай көмө, субуотунньук тэрийдилэр.
Оҕолорбут маладьыастар! Бүгүҥҥү үлэ күнүгэр гимназистар туруоруллубут сыалга-сорукка олус эппиэтинэстээхтик сыһыаннаһан, үлэҕэ-хамнаска сыстаҕастарын туоһулууллар.
Диана Дьячковская