Бэйдиэ сылдьар ыттары бэрээдэктиир бөлөх 2024 сыл саҕаланыаҕыттан муус устар 10 күнүгэр диэри Нам сэлиэнньэтин уулуссаларыттан приюкка 48 көҥүл сылдьар ыты тутан аҕалбыт.
Бүгүҥҥү күҥҥэ 2 ыт стерилизацияламмыт, 12 – кастрацияламмыт, 14 – маркировкаламмыт уонна 29 ыт вакцинацияламмыт. 15 дьиэ кыыла хаһаайыныгар төннөрүллүбүт, 3 ыт саҥа хаһаайыннаммыт, 2 ыт урукку сылдьар сиригэр төннөрүллүбүт. Бүгүҥҥү күҥҥэ приюкка 27 ыт баарын Василий Крымков этэр. Ону тэҥэ, биир ыт приюттан күрээбит.
Санатабыт!
Хаһаайыттар “Дьиэ кыылын иитиигэ ирдэбил” 13 ыст. 2018 с. ахсынньы 27 күнүттэн ФЗ-N498 “Кыылы эппиэтинэстээхтик иитии” быраабылалары тутуһаргытын, эппиэтинэс сүгэргитин умнуман!
Ыт дьону ытыран, дьоҥҥо саба түһэн доруобуйаларын айгыратар түгэнигэр, ыты бас билээччи административнай эппиэккэ тардыллыахтааҕын билиэхтээх, өйдүөхтээх. Хаһаайын ыты иитии Быраабылатын кэһэн КоАП РФ 8.52 Ыстатыйанан 5000 солкуобайтан 15 000 солк. диэри ыстырааптанар уонна бу сокуоҥҥа олоҕуран эмсэҕэлээбит киһиэхэ материальнай хоромньутун толуйар.
Харысхан Попов