Бүгүн Нам улууһугар өрөспүүбүлүкэтээҕи мобильнай киин быраастарын биригээдэтин уочараттаах бөлөҕө: терапевт, кардиолог, невролог, ортопед, педиатр, акушер-гинеколог, эндокринолог, ЛОР, УЗД кэллилэр. Кинилэр сүрүн соруктара – халаан уутугар эмсэҕэлээбит нэһилиэнньэҕэ медицинскэй көмөнү оҥоруу.
Бөлөх бэс ыйын 21 күнүгэр диэри үлэлиэҕэ. Бүгүн 2 Хомустаахха, сарсын Фрунзеҕа, өйүүн Көбөкөҥҥө, бэс ыйын 20-гэр Арбыҥҥа дьон доруобуйатын көрүөхтэрэ. Маныаха кинилэри транспорынан Намнааҕы киин балыыһа хааччыйда.
Бу иннинэ ыам ыйын 31-тэн бэс ыйын 6 күнүгэр диэри киин быраастарын биригээдэтэ Хатырыкка, Түбэҕэ, Модукка, Бөтүҥҥэ, Граф Биэрэгэр, Аппааныга сылдьан 468 улахан киһини, 85 оҕону көрбүттэрэ.
Бэлиэтээн эттэххэ, “Өрөспүүбүлүкэтээҕи мобильнай биригээдэ киинэ” СӨ Ил Дархана Айсен Николаев көҕүлээһининэн тэриллибитэ. Бу үлэ дойду президенэ Владимир Путин олохтообут “Доруобуйа” национальнай бырайыак соругун толорор сыаллаах ыытыллар. Бу туһунан СӨ Ил Дарханын уонна правительствотын пресс-сулууспата иһитиннэрдэ.
Л. Ноговицына