Нам улууһугар Таҥха күннэрэ салҕаналлар. Хамаҕаттаҕа бүгүн “Кэскил” балаҕаҥҥа Ефим Шапошников аатынан орто оскуола алын кылаас үөрэнээччилэригэр саха итэҕэлигэр аналлаах тэрээһин буолбут.
Оскуола педагог-тэрийээччитэ Ачикасова Нина Тимофеевна салалтатынан буолбут “Сахалыы оонньуулар” тэрээһин бэрт сэргэхтик, интэриэһинэйдик ааспыт. Тэрээһин 2025 сыл Иэйэхсит сыла, тохсунньу ый Таҥха ыйа буолалларын туһунан билиһиннэрииттэн саҕаламмытын Хамаҕатта нэһилиэгин библиотекара Марина Коркякина этэр. Бүгүҥҥү “Сахалыы оонньуулар” тэрээһиҥҥэ Хамаҕатта библиотекара Марина Корякина уонна Никольскайдааҕы И.С. Шарапов аатынан сири туһаныы түмэл үлэһиттэрэ өбүгэттэн кэлбит төрүт оонньуулары кэпсээн билиһиннэрбиттэр. Чуолаан, оҕо алын кылааска үөрэнэр сааһыгар саамай барыны-бары интэриэһэргиир, оонньуур кэмэ буоларынан ааттанар.
Оҕо барыга-бары билии ыларын туһугар кыһаллыы – учуутал үлэтэ. Алын кылаас оҕолоро бары биир сиргэ мустуулара – учууталлар уопсай дьыала туһугар биир санааны тутуһан ситимнээхтик үлэлииллэриттэн тахсар. Бу күн саха төрүт оонньууларын билэргэ-көрөргө Федорова Маргарита Ильинична (1 кыл.), Скрябина Александра Аркадьевна (2 кыл.), Кельциева Сахая Альбертовна (3 “а” кыл.), Васильева Лилия Алексеевна (3 “б” кыл.), Амбросьева Елена Дмитриевна (4 “а” кыл.), Монастырева Юлия Николаевна (4 “б” кыл.) 96 үөрэнээччини аҕалбыттар.
“Таҥха кэмэ үгэннээн турдаҕына, саҥа сылга нэһилиэкпит “Кэскил” балаҕаныгар мустаммыт көмүлүөк оһоҕу оттон, аал уот иччитин алаадьынан күндүлээн, боҕуруоскай от буруотунан ыраастанан, “Сахалыы оонньуулар” – өбүгэлэрбит оонньууларын үөрэнээччилэр олус сэҥээрдилэр, дуоһуйа оонньоотулар”, – диэн билиһиннэрэр Марина Саввична.
Харысхан Попов