Хамаҕатта нэһилиэгин “Үрдэл” түөлбэтэ “Дворовая площадка” бырайыагын “Эбээ үөрэҕэ” диэн программанан түөлбэтин оҕолоругар анаан, атырдьах ыйын 7-9 күннэригэр салгыы ыытта.
Оҕолор үс күн үс эбээҕэ сылдьаннар, элбэҕи билбиттэрин-көрбүттэрин, оонньообуттарын “Үрдэл” түөлбэ көхтөөх олохтооҕо Саргылана Индеева бэлиэтиир.
“Эбээ үөрэҕин” бастакы күнүгэр оҕолор “Үрдэл” түөлбэ салайааччыта, элбэх оҕо эбэтэ, бэтэрээн учуутал Саввинова Екатерина Гаврильевнаҕа ыалдьыттаабыттар. Ол күн түөлбэ 7 оҕото былыргы оҥоһуктар, маллар-саллар сахалыы ааттарын истэн билбиттэрэ этиллэр. Ону тэҥэ, уулуссаларын, түөлбэлэрин ааттарын билсибиттэр, оҕуруот көрбүттэр. Сынньалаҥҥа сахалыы остуол оонньуутугар – хабылыкка, хаамыскаҕа тургутуспуттар. Олуһун астынан, үөрэн- көтөн тарҕаспыттар.
Атырдьах ыйын 8 күнүгэр элбэх оҕо эбэтэ, хос эбэтэ, бэтэрээн Индеева Надежда Вдадимировнаҕа 14 оҕо кэлэн Ытык 102 саастаах эбээ туһунан, кинигэ арааһын, мунньуу иһиттэри көрбүттэр-истибиттэр. “Ыалдьыт оҕолорум сайын устата төһө кинигэ аахпыттарын, сурук суруйбуттарын туоһуласпытым. Оҕолорбун минньигэһинэн күндүлээбитим”, – диир Надежда Владимировна.
Бырайыак бүтэһик күнүгэр оҕолор элбэх оҕо эбэтигэр, бэтэрээн учууталыгар Посельская Александра Лукиничнаҕа тиийэннэр отонноох үүнээйилэр тустарынан кэпсэппиттэр, уһаайба иһигэр үүнэр моонньоҕону, кыһыл хаптаҕаһы, биэ эмиийин (малина), дөлүһүөнү көрбүттэр, амсайбыттар. “Холобура, оҕолор биир амсайыыттан отону, сугуну, дьэдьэни быһаарарга холоммуттара. Ол күн сэргэх, көхтөөх оҕолору кытта сүүрүүлээх-көтүүлээх оонньуулары көҕүлүттэн туппуппут”, – диир Александра Лукинична.
Харысхан Попов