Хамаҕаттаҕа 2024 сылы — Доруобуйа сылын түмүктүүр, нэһилиэккэ балыыһа тэриллибитэ 80 сылын бэлиэтиир үөрүүлээх тэрээһин «Түһүлгэ» норуот айымньытын киинигэр буолла. Тэрээһин бастакы чааһыгар нэһилиэк баһылыга Евгений Ушницкай сыл устата туох үлэ барбытын, ол иһигэр бэйэ көҕүлээһинин өйүүр программанан хаҥкылыыр, хоккейдыыр каток үлэтэ түмүктэммитин иһитиннэрдэ.
Бу үөрүүлээх күҥҥэ Доруобуйа харыстабылын эйгэтигэр өр сыллаах эҥкилэ суох үлэлэрин иһин Эльви Давыдовна Ушницкая «СӨ доруобуйа харыстабылын бочуоттаах ветерана», Роберт Никитич Петров «Хамаҕатта нэһилиэгин Ытык киһитэ», Надежда Ивановна Петрова «Нам улууһун социальнай -экономическай сайдыытыгар кылаатын иһин» бэлиэнэн наҕараадаланнылар.
Улуус баһылыгын социальнай боппуруостарга солбуйааччы Егор Протопопов, улуус кылаабынай бырааһа Ариан Сергеев, баһылык Евгений Ушницкай, түөлбэ активтара үбүлүөйдээх сылынан Хамаҕаттаҕа араас кэмнэргэ үлэлээбит уонна үлэлии сылдьар медиктэргэ грамоталары, махтал суруктары туттарбыттарын олохтоохтор дохсун ытыс тыаһынан биһирииллэрин биллэрдилэр, ырыаһыттар Дмитрий Барабанов, Ньургун Кудрин, Михаил Макаров, Николай Бурнашев, Александр Захаров, Екатерина Заболоцкая кыргыттарынаан музыкальнай эҕэрдэлэрин тиэртилэр. Хас биирдии үрүҥ халааттаах аанньалга болҕомто ууруллан, эҕэрдэлээх махтал тыллара ананнылар.
Улуус кылаабынай бырааһа Ариан Сергеев Доруобуйа сылынан олохтоох балыыһаҕа аптека аһыллыбытын, мөлүйүөн сэттэ сүүс суумалаах саҥа миэбэл, оборудование бэриллибитин, участковай быраас Марина Гоголева, аҕыс үлэһит нэһилиэнньэ туһугар кыһамньылаах үлэлэрин үрдүк сыанаттан сырдаттылар.
Дьоро киэһэ иккис чааһыгар үбүлүөйдээх сылга анаммыт «Чэгиэн-чэбдик олох туһугар» саҥа тахсыбыт кинигэ сүрэхтэниитэ буолла. Кинигэни нэһилиэк кыраайы үөрэтээччитэ Николай Дмитриевич Захаров хомуйбут матырыйаалынан, кини салайыытынан 9 киһилээх редколлегия бэлэмнээн «Көмүөл» кинигэ кыһатыгар бэчээттэппит. Олохтоох библиотекарь Марина Корякина кинигэ ис хоһоонун, үлэ хайдах барбытын билиһиннэрдэ. Куруутун көмөлөһөр «Көмүөл» редактора Борис Павлов хамаҕатталарга күндү ыалдьытынан буолла.
Бу киэһэ мустубут дьон үтүөкэн дьоммутугар уһун сыллар тухары олохтоох нэһилиэнньэ чэгиэн-чэбдик туруктанарыгар, чөл олохтоох буоларыгар ахсаабат кыһамньыларыгар барҕа махталын анаата. Уустук үлэлээх идэтийбит эмчиттэргэ түбүктээх үлэлэрэ таһаарыылаах буоларыгар баҕарда.
Мария Винокурова