Нам улууһугар хапсаҕайга Хамаҕатта нэһилиэгин аһаҕас турнирыгар 35 уол күрэхтэстэ. Бүгүҥҥү Хамаҕатта нэһилиэгин бирииһигэр ыытыллыбыт хапсаҕайга оҕолор оскуолаларын чиэһин көмүскээбиттэрин кылаабынай судьуйа Айхан Парников этэр.
Ол курдук, Намнааҕы бастакы, иккис оскуолалар; Хамаҕаттатааҕы орто оскуола; саха-француз лицей; Модут оскуолата; Хатырык оскуолата; 2 Хомустаах оскуолата; Түбэ оскуолата уонна Дьокуускайтан Модун үс иитиллээччитэ кыттыыны ыллылар.
Хапсаҕай күрэхтэһиитин муҥутуур кыайыылааҕынан Модунтан Слепцов Артур ааттанан “Лигран” ХЭТ салайааччыта Григорий Кобяков туруорбут бирииһинэн наҕараадаланна. Ону тэҥэ, Гоголев Дуолан “Кыайыыга дьулуурун иһин” Айхан Парниковтан уонна Дедюкин Айсен “За лучшую технику” Юрий Балаганскайтан анал бириистэри туттулар. Бэлиэтээн эттэххэ, улуус чиэһин өрөспүүбүлүкэтээҕи хапсаҕай түһүлгэлэригэр көмүскээбит Айхан Парников, Нам улууһун биллэр хапсаҕайдьыта Николай Парников уола буолар.
“Бастакы тэрийбит күрэхтэһиибит этэҥҥэ ааста. Бэйэм астынным. Наммыт улууһун хас биирдии нэһилиэктэригэр спорт сайда, күрэхтэһиилэр ыытылла турдуннар. Маны этэн туран, оҕолорго спорт бары көрүҥнэригэр күрэхтэһиибитин элбэтиэххэ, оҥорон иһиэххэ диэн ыҥырабын. Улууска оҕо спорда сайдарыгар үгүс күрэхтэһии ыытылларыгар баҕарабын.
Күрэхтэһиигэ күүс-көмө буолан спонсордаабыт дьоммор улахан махталбын тиэрдэбин: Ушницкай Евгений Сергеевич баһылыктаах олохтоох дьаһалтаҕа; Балаганскай Юрий Сергеевич дириэктэрдээх улуустаҕы “Олимпик” спорт оскуолаҕа; Харитонова Антонина Алексеевна дириэктэрдээх “Түһүлгэ” норуот айымньытын киинигэр; Хамаҕаттабыт урбаанньыттарыгар, спорду таптааччыларыгар Кобяков Григорий Андреевичка, Николаев Альберт Васильевичка; аҕабар Парников Николай Алексеевичка”, – диэн кэпсиир Айхан Николаевич.
Харысхан Попов
Хапсаҕайга Хамаҕатта нэһилиэгин аһаҕас турнирын кыайыылаахара:
50 кг:
I миэстэ — Хатырыктан Винокуров Давид;
II миэстэ — 2 Хомустаахтан Ефимов Леонид;
III миэстэ — Хатырыктан Иванов Борис.
60 кг:
I миэстэ — Гуляев Николай (Хатырык);
II миэстэ — Хатыҥ Арыыттан Стручков Павел;
III миэстэ — Хамаҕатта саха-француз лицейыттан Федоров Илья.
70 кг:
I миэстэ — Намнааҕы бастакы нүөмэрдээх оскуолаттан Куприянов Ярослав;
II миэстэ — Түбэттэн Захаров Кирилл;
III миэстэ — Колосов Степан (Хатыҥ Арыы).
70 кг үөһэ:
I миэстэ — Иванов Артем (ХСФЛ);
II миэстэ — Модунтан Слепцов Артур;
III миэстэ — Дедюкин Айсен (ХСФЛ).