Бүгүн «Тускул» оҕо уһуйааныгар, Е.М. Шапошников аатынан хартыына галереятыгар, кырачаан уруһуйдьут оҕолор «Айар кустук» быыстапкалара аһылынна.
Эбии үөрэхтээһин педагога Октябрина Барашкова уһуйаан иитиллээччилэригэр уруһуй дьарыгын ыытар. Оҕолору искусство бу көрүҥэр сыһыарар, араас куонкурустарга кытыннарар. Ол түмүгэр дьоҕурдаах оҕолор: 6 саастаах Эрхан Федотов, 5 саастаах Мичил Захаров тус быыстапкаларын тэрийдилэр. Манна портрет, пейзаж, графика жанрдарыгар үлэлэрэ, пластилинтан оҥоһуктара турдулар.
Быыстапка кыттыылаахтарын уһуйаан сэбиэдиссэйэ Аида Местникова эҕэрдэлээтэ, иитээччи Октябрина Барашкова оҕолор үлэлэрин сырдатта. Кэрэ эйгэ тыыннаах сонун тэрээһиҥҥэ оҕолор төрөппүттэрэ Александра Федотова, Агафья Захарова, олохтоох искусство оҕо оскуолатын салайааччыта Юрий Сивцев, худуоһунньук Федор Федорович Павлов кэргэнинээн Екатерина Павловналыын ыалдьыттаатылар, эҕэрдэҕэ кыттыстылар.
Ити курдук, уран дьарык саҥа үнүгэстэрэ быган эрэллэрэ, уһуйаан үлэтин биир хайысхатын бастакы хардыылара көһүннүлэр.
Мария Винокурова