Аан дойдуга үҥкүү күнүнэн Хамаҕатта нэһилиэгин «Ретро-Данс» үҥкүү бөлөҕөр махталлаах эҕэрдэ!
Саха республикатын өрөгөйдөөх күнүгэр «Ретро-Данс» бальнай үҥкүү народнай ансаамбылын салайааччыта, СР культуратын үтүөлээх үлэһитэ Любовь Алексеевна Андросова «Верность профессии» диэн 50 сыллаах үлэтин отчуоттуур кэнсиэрэ үрдүк таһымҥа буолан ааспытын үтүө сонун оҥостон бу күннэргэ дьон-сэргэ уостан түһэрбэккэ кэпсэтэр.
Россияҕа Дьиэ кэргэн сылынан сыһыаран эттэххэ, «Ретро Данс» үҥкүү бөлөҕөр биир дьиэ кэргэнтэн, аймахтыы үҥкүүһүттэр элбэхтэр. Ол курдук, ийэлээх кыыс Екатерина, Надежда Саввиновалар, бииргэ төрөөбүттэр Раиса Никитина, Иван Кокорев, кэргэннии Надежда, Михаил Новгородовтар кыыстарынаан Оксаналыын, эдьиий-сиэн быраат Любовь, Андрей Охлопковтар, эдэр ыаллар Вероника, Сандр Находкиннар, Вера, Егор Васильевтар сыанаттан түспэт бастыҥ үҥкүүһүттэр.
«Ретро-Данс» толоруутугар «Кырдьыбат вальс», «Синий платочек», «Стиляги» онтон да атын араас көлүөнэ чаҕылхай үҥкүүлэрэ ким сүрэҕин өрүкүппэтэхтэрэ баарай?!
Кэрэни саҕар күндү үтүө дьоммут, бар дьоҥҥутугар үчүгэйи үксэтэр үҥкүүгүтүнэн дуоһуйууну бэлэхтии, төрөөбүт нэһилиэккитин ааттата тураргытыгар!
Мария Винокурова