Хатыҥ Арыы нэһилиэгин «Гильдия» устудьуоннар этэрээттэрэ биир ыйдаах үлэтин түмүктээтэ. Этэрээти командир Кира Сыроватская, куратор Надежда Сивцева салайан үлэлэттилэр.
«Гильдия» этэрээккэ үс уол, сэттэ кыыс буолан үлэлээтилэр, нэһилиэк тупсаҕай буоларыгар үлэлэстилэр.
Ол курдук халаан уута аҕалан бырахпыт бөҕүн, ону тэҥэ даамба, суол кытыытыгар ууруллубут кумахтаах сүүсчэкэ куулу сүөкээтилэр, уопсайа 8 бырысыап бөх хомуйдулар, өрүс кытылын, «Мэҥэ Таас» таһын хомуйдулар, ыһыахтыыр паарка хомулунна, Аппааны сэлиэнньэтигэр «Мавра» күөлүгэр баар сынньанар былаһаакканы кырааскалаатылар, күрүөтүн өрүмүөннээтилэр, Кыһыл Дэриэбинэ кытылын күрүөтүн олохтоохтору кытары өрүмүөннээтилэр, сквердэри ыраастааһыҥҥа үлэлэстилэр, бастакы группалаах инбэлииккэ хортуоппуйун көбүттүлэр, халаан уутун докумуонун хомуйууга, киллэриигэ үлэлэстилэр.
От ыйын 10 күнүгэр этэрээт үлэтин түмүктүүр тэрээһин ыытылынна. Манна устудьуоннар биирдиилээн, группаннан оҥорон аҕалбыт хаһыаттарын түмүгэ таҕыста.
Бастакы миэстэни Джулиана Охлопкова, Гелия Стрекаловская «Спортивная игра-Дети Азии», иккис миэстэни Эмма, Дайаана Софроновтар «Спорт-залог здоровья», үһүс миэстэни Василиса Игнатьева « Выключи-загрязнение воды» хаһыаттара кыайылаах буолла. Онтон Кира Сыроватская, Эльза Прокопьева «Берегите природу», Алина Старостина «Земля –это наш дом» хаһыаттара биһирэбил бирииһи ылан, бары минньигэс астарынан, грамотанан наҕараадаланнылар.
Нэһилиэк олоҕор көхтөөх кыттыыларын, тупсаран оҥорууга киллэрбит кылааттарын иһин олохтоох дьаһалта баһылыга Иван Ноговицын махтал суруктарын туттулар. Остуол тула олорон чэйдээн, оонньоон, үлэ араас түгэннэрин ахтыһан тарҕастылар.
Саха өрөспүүбүлүкэтин салалтатыгар маннык устудьуоннар этэрээттэрэ тэриллэн сөптөөх программалар үлэлээннэр, субсидия көрүллэригэр устудьуоннар махтал тылларын тиэрдэллэр.
Надежда Сивцева