2023 сыллаахха Наммыт улууһун олохтоохторугар үөрүүлээх күн үүммүтэ. Намнааҕы кырдьаҕастар уонна инбэлииттэр интэринээт-дьиэлэрэ бэрэсидьиэн Владимир Путин көҕүлээбит “Демография” национальнай бырайыак “Аҕам саастаах көлүөнэ” бырайыагынан тутуллан, үлэҕэ киирбитэ.
Бастакы интэринээт-дьиэ 1994 сыллаахха тэриллибитэ. Урут манна 30 киһи олорбут буоллаҕына, билигин 65 миэстэлээх. Үлэһиттэр ахсааннара эмиэ икки төгүл эбиллэн үлэлии олороллор.
Онуоха саҥа дьиэҕэ киирэн олорон, дьону-сэргэни, ыалдьыты көрсөр үөрүү буоллаҕа. Ол курдук, олунньу 15 күнүгэр Розалия Черкашина салайааччылаах «Хардыы» хотугу хаалыктаах хаамыы бөлөҕө кырдьаҕастарга тиийэн, Клара Матвеева маастар кылаас көрдөрдө. Ыалдьыттары Мария Матвеева эйэҕэс мичээринэн үөрэ тоhуйда. Кини бу уораҕай олохтоохторугар сынньалаҥнарын тэрийэр, үөрүүлэрин үксэтэр саамай төһүү киһилэрэ буолар.
Хардыылар 11 буолан кэлэн, хас биирдии бэйэлэрэ отон кэһиилээх, кинигэ тутуурдаах уонна канцтовар аҕалбыттар.
Утарыта кэнсиэринэн эҕэрдэстилэр, дьиэлээхтэр үҥкүүлээн тэлээрдилэр, ыалдьыттар ылбаҕай ырыанан күндүлээтилэр. Онуоха бытаан ырыа муусукатыгар Хардыылар олохтоох эр дьону вальска ыҥыран бытааннык эргийдилэр.
Маннык кэмҥэ курус санаалар төһө да киирдэллэр, дьон ортотугар сылдьан олох тыынын ылар үөрүү. Мэлдьитин минньигэс астаах повардар, күннэтэ кыhаллар үтүө санаалаах үлэhиттэр өрүү аттыгар.
Лена Корякина