Намнааҕы 3-с нүөмэрдээх оскуола 5-с “б” кылаас үөрэнээччилэрин “Хардыы” этэрээтэ быйылгы үөрэх дьылыгар “Ипподром” түөлбэҕэ баар “Бэтэрээннэр муосталарын” үстэ тахсан ыраастаата. Волонтер оҕолору оскуола навигатора П.А. Бучугасов салайан үлэлэтэр. “Хардыы” этэрээт уолаттара үлэлии үөрэнэн, үөрүүнэн бараллар.
Биир үлэ сырыытыгар “Ипподром” түөлбэ салайааччыта Т.И. Осипова Аҕа дойдуну көмүскээччилэр күннэринэн олохтоохтор ааттарыттан сэмэй бэлэх туттаран, үлэһит оҕолор үөрүүлэрин үксэппитэ. Уол оҕо кыра эрдэҕиттэн үлэни таптыыр эр киһи буола улааттын.
Оскуола коллективыгар, салайааччыларга, үөрэнээччилэргэ уонна “Мичил” уһуйаан үлэһиттэригэр А.А. Николаевка, Г.И. Сыроватскайка түөлбэ олохтоохторун аатыттан дириҥ махталбытын тиэрдэбит. Үтүө санаалаах үлэһиттэргэ, үөрэнээччилэргэ, ситиһиилээх үөрэҕи, үлэни, чэгиэн-чэбдик доруобуйаны баҕарабыт.
“Ипподром” түөлбэ олохтоохторо