Хатыҥ Арыы нэһилиэгин баһылыгын солбуйааччы Максим Мордосов бүгүн, балаҕан ыйын 9 күнүгэр, тэрилтэлэр планеркаларын оҥордо. Кини Дария Мальцева салайааччылаах «Сыдьаайа» иистэнэр сыаҕын эҕэрдэлээтэ уонна баһылык бочуотунай грамоталарын, ДНС маҕаһыыҥҥа 10 тыһ. суумалаах сертификаты үөрүүлээх быһыыга-майгыга туттарда. Сыдьаайалар бу сыл ыам ыйын 28 — бэс ыйын 8 күннэригэр «Стежка за стежкой, метр за метр…..» байыаннай дьайыы кыттыылаахтарыгар таҥас тигиитигэр алтыс төгүлүн ыытыллыбыт өрөспүүбүлүкэтээҕи күрэххэ Нам улууһуттан кыттан, үһүс бочуоттаах миэстэни ылбыттара.
Иистэнэр сыах хамаандата: Дария Мальцева, Мария Кривошапкина, Галина Суханова, Валентина Сивцева, Варвара Слепцова, Раиса Уваровская, Анастасия Доромонова, Айталина Уваровская, Надежда Дьяконова уон күн устата иистэнэннэр, уопсайа 149 устуука байыаннай таҥаһы тиктилэр. “Туймаада” ыһыаҕар ыҥырыллан, производственнай остуоллаах иистэнэр массыынанан наҕараадаламмыттара.
Иистэнэр сыах үлэлиир кэмигэр Граф Биэрэгин «Надежда» маҕаһыына эбиэттииллэригэр бородууктанан көмө оҥорбута. Маҕаһыын салайааччыта Надежда Власоваҕа махтал тылларын тиэрдэн туран, баһылык грамотатын туттардылар. Бу курдук бириэмэлэрин аахсыбакка, биир дойдулаахтарыгар “ыалдьар”, көмө оҥорор дьоммутунан киэн туттабыт уонна муҥура суох махтанабыт!
Надежда Власова
Кыһыл Дэриэбинэтээҕи үүт тутар пууҥҥа Розалия Кривошапкина алтыс сылын ситиһиилээхтик үлэлиир, олохтоохтор махталларын ылар. Аппааны үүт тутар пуунугар быйыл сайын АГИКИ 2 куурус устудьуонката Виктория Петрова үлэлээбитэ. Эдэр кыыс үлэтигэр кыһамньылааҕын Аппааны олохтоохторо элбэхтэ бэлиэтээн эппиттэрэ. Розалия Егоровнаҕа уонна Виктория Николаевнаҕа үлэригэр, үөрэхтэригэр үрдүк ситиһиилэри баҕаран туран, Максим Мордосов баһылык грамоталарын туттарда.
Розалия Кривошапкина
Виктория Петрова аҕата
Бу курдук нэһилиэкпит дьоно общественнай олоххо, үлэҕэ киллэрэр кылааттарынан киэн туттабыт, махтанабыт!
Надежда Сивцева