Бүгүн, балаҕан ыйын 8 күнүгэр Нам сэлиэнньэтин «Эҥсиэли» стадионугар Дьиэ кэргэн сылынан , «Дьиэ кэргэнинэн сынньанабыт» хамсааһын чэрчитинэн, аан бастакытын «Семейный забег» тэрээһин ыытылынна. Сүүрүү Намнааҕы Дьиэ кэргэн уонна ыччат политикатын отделын көҕүлээһининэн буолла.
Уопсайа 9 ыал кыттыылаах тэрээһини дьиэ кэргэн отделын специалиһа Инга Дмитриевна Захарова ыытта.
Хатыҥ Арыы нэьилиэгиттэн икки дьиэ кэргэн: Күннэй, Максим Алексеевтар уолаттара Айхал, Эрэл уонна Нария, Сергей Семеновтар оҕолорунаан Фея, Федя, Саргын, Сияна буолан сүүрүүгэ кытыннылар. Семеновтар дьиэ кэргэн кыыстара Сияна 1,6 саастаах «Саамай кыра кыттааччы» аатын сүгэн, 5000 солк. сертфикатынан наҕараадаланна.
Бары сүүрүүгэ кыттыбыт дьиэ кэргэттэр мэтээллэри, туоһу суруктары уонна сэмэй бэлэхтэри туттулар. Олохтоох дьаһалта көхтөөх ыалга махтал сурук уонна кинигэ бэлэх уунна.
Нэһилиэкпит аатыттан кыттыбыт эдэр ыалларбытыгар махтанан туран үлэлэригэр, үөрэхтэригэр ситиһиини, чэгиэн доруобуйаны баҕарабыт!
Надежда Сивцева