Хатыҥ Арыы нэһилиэгэр ааспыт Наставник уонна Педагог сылын чэрчитинэн, 11 киһилээх наставниктар сэбиэттэрэ 2023 сыл тохсунньу 20 күнүгэр тэриллэн, Аппааныга Дмитрий Иванович Ноговицын, Граф Биэрэгэр Людмила Васильевна Петрова, Кыһыл Дэриэбинэҕэ Айталина Гаврильевна Винокурова салайыыларынан үгүс үлэ ыытылынна.
Үлэ 6 хайысханан барда. Ол курдук, Васильева Анна Ефимовна, Саввина Нина Семеновна, Колесова Александра Аркадьевна оскуолалары кытта оҕо иитиитигэр үлэлэстилэр; Соловьева Зоя Кононовна — садоводство, оҕуруот; Лебедева Оксана Ивановна ветераннары кытта үлэ; Носкова Клавдия Петровна, Петрова Екатерина Матвеевна сахалыы остуол оонньууларын тарҕатыынан, сөргүтүүнэн үлэлээтилэр; Маркова Мария Николаевна, Сивцева Надежда Дмитриевна общественноһы кытта, тыа хаһаайыстыбатыгар Ноговицын Дмитрий Иванович үлэлээтилэр.
Дмитрий Ноговицын кинигэ тахсарыгар Хатыҥ Арыы совхозка үлэлээбит ветераннартан ахтыылары хомуйан үгүс үлэни ыытта. Сэтинньигэ 80-н тахса киһилээх урут Хатыҥ Арыы совхозка киирбит Аппааны, Кыһыл Дэриэбинэ, Искра, Бөтүҥ отделениеларын ветеран үлэһиттэрин түмэн, улахан тэрээһиннээх биэчэр буолбута. Маны тэҥэ, Кыайыы 80 сылыгар бэлэмнэнии үлэлэрэ ыытыллаллар.
Людмила Петрова, Клара Носкова Хатыҥ Арыытааҕы кыраайы үөрэтэр музейга эдэр специалистка наставниктыыллар. Сэбиэт наставниктара сыл устата оскуолаларга сылдьаннар оҕолорго араас бэсиэдэлэри ыыттылар, Чиряевскай ааҕыыларга кыттыыны ыллылар.
Салгыы нэһилиэккэ аҕа сүбэтин үлэтин сөргүтүүгэ, эдэр депутаттарга көмө оҥорууга үлэ барыаҕа. Наставниктар сэбиэттэрэ нэһилиэккэ, улууска ыытыллар акцияларга көхтөөх кыттыыны ылар, эдэрдэргэ өрүү сүбэ-ама буолар.
Надежда Сивцева