Хатыҥ Арыы нэһилиэгэр 10 байыастаах «Гильдия» устудьуоннар этэрээттэрэ бэс ыйын 10 күнүттэн үлэтин саҕалаата.
Этэрээккэ үрдүк уонна орто үөрэх кыһатыгар үөрэнэр устудьуоннар биир ыйга үлэлиэхтэрэ. Этэрээт хамандыырынан Кира Сыроватская ананна. Устудьуоннар үлэлэрин олохтоох дьаһалта сүрүннүүр специалиһа Надежда Сивцева салайар. Дьокуускайтан өрөспүүбүлүкэтээҕи устудьуоннар этэрээттэрин салайааччыта Соловьев Айсен Владимирович күүс-көмө буолуоҕа.
Бастакы күн билсиһии, таҥас-сап түҥэтиитэ уонна сэрэхтээх буолууга инструктаж ыытылынна.
Устудьуоннар биир ый устата бөх хомуйуохтара, өрөмүөн үлэтэ, сквердэри, былаһааккалары кырааскалыахтара. Бу күннэргэ ыһыах ыытылларынан, Кыһыл Дэриэбинэтээҕи «Хатыҥ Чараҥ» пааркатыгар уу аҕалбыт бөҕүн, хаппыт мастары хомуйдулар. Бүгүн Аппааны сэлиэнньэтин «Мавра» күөлүгэр баар былаһааккаҕа кырааска үлэтэ, күрүө өрүмүөнэ бара турар.
Саха Республикатын Ыччат политикатын Министерствотыттан субсидия быһыытынан көрүллэн бастаан Нам улууһун дьаһалтатыгар, онтон устудьуоннары үлэлэтэр дьаһалтаҕа, устудьуоннар хамнастара, таҥастара, нолуок харчыта түһүөҕэ. Онон оҕолор биир ый үлэлээннэр 50 тыһ. хамнас аахсыахтара, сайыҥҥы сынньалаҥнарын туһалаахтык атаарыахтара.
Надежда Сивцева