Ахсынньы 17 күнүгэр, дьиэ кэргэн сылын көрсө, «Мама, Папа, Я — спортивная семья» күрэх региональнай түһүмэҕэр Нам улууһуттан Тимофеевтар дьиэ кэргэн кыттан, бочуоттаах 2 миэстэни ыллылар. Күрэх Дьокуускайдааҕы национальнай гимназияҕа ыытылынна.
Спортивнай күрэххэ өрөспүүбүлүкэбит араас муннуктарыттан барыта 10 улуус саамай күүстээх хамаандалара кытыннылар. Тэрийээччилэр быһаарыыларынан хамаандалар икки бөлөххө арахсан күрэхтэспиттэр: уол уонна кыыс оҕолордоох ыаллар. Дьиэ кэргэттэр 6 көрүҥҥэ тургутууну аастылар: бэйэни билиһиннэрии, теннис мээчигинэн сыалы табыы, сиргэ сытан илиинэн анньыныы (отжимание), ырааҕы ыстаныы, пресс хачайданыы уонна скакалка.
Күрэхтэспит дьиэ кэргэттэр эт-хаан өттүнэн үчүгэй сайдыылаахтарын көрдөрбүттэр. Күрэх түмүгүнэн:
Уол оҕолоох ыалларга: 1 м. – Чурапчыттан Беляевтар, 2 м. – Намтан Тимофеевтар уонна 3 м. Уус Алдантан Архиповтар дьиэ кэргэттэрэ буолбуттар.
Кыргыттардаах дьиэ кэргэттэргэ: 1 м. – Сунтаартан Никифоровтар, 2 м. – Мэҥэ Хаҥаластан Васильевтар, 3 м. Амматтан Баишевтар дьиэ кэргэттэрэ ылбыттар.
Кыайыылаах хамаандалар кубогынан, мэтээллэринэн уонна грамоталарынан наҕараадаламмыттар. Күрэҕи тэрийээччилэр оҕолорго өйдөбүнньүк бириис туттарбыттар.
Майя Федорова
Хаартыскалар: Гуляев Н.Н.