Сэтинньи 30 күнүгэр Кыһыл Дэриэбинэ «Сайдыы» сынньалаҥ киинигэр, Нам улууһун үөрэҕин управлениета тэрийиитинэн, оскуолаҕа киириэн иннинээҕи саастаах оҕолорго, кинилэр дьиэ кэргэттэригэр аналлаах «Ийэм, аҕам уонна мин — спорт аргыстаах дьиэ кэргэн» улуустааҕы күрэхтэһии олус сэргэхтик, өрө көтөҕүллүүлээхтик ааста.
Бу иннинэ соҕуруу, хоту, киин бөлөҕүнэн методическай холбоһуктарын (КМО) уһуйааннара бэйэлэрин истэригэр илин-кэлин түсүһэннэр, кыайыылаах үстүү дьиэ кэргэн улуустааҕы күрэхтэһиигэ сүүмэрдэммиттэрэ. Онон спорка дьоҕурдаах, эт-хаан өттүнэн дьарыктанар, сымса туттунуулаах 7 дьиэ кэргэн КМО-ларын көмүскээн улуустааҕы күрэхтэһиигэ кытыннылар.
«Ийэм, аҕам уонна мин — спорт аргыстаах дьиэ кэргэн» 6 түһүмэхтээх буолла. Ол курдук, бэйэлэрин билиһиннэрдилэр, миэстэлэриттэн туран ырааҕы ыстаннылар, муостаттан илиилэринэн анньыннылар, көҕүстэрин көтөхтүлэр, сыал бырахтылар, скакалкалаах ыстаннылар. Хас түһүмэх аайы оҕолор ийэлэрин, аҕаларын кытары тэбис-тэҥҥэ кытыннылар.
Спордунан дьарыктанар дьиэ кэргэн күрэхтэһиитин түмүгүнэн кыайыылаахтарынан Аппаанытааҕы «Сандаара» 2-с №-дээх уһуйаанын иитиллээччитэ Амир төрөппүттэринээн Анастасия, Александр Тимофеевтар буоллулар. Иккис миэстэҕэ Хамаҕаттатааҕы «Тускул» уһуйаан иитиллээччитэ Сайнаара төрөппүттэринээн Яна, Николай Ивановтар таҕыстылар. Үһүс миэстэни Ленскэй 1-кы №-дээх «Солнышко» уһуйаан иитиллээччитэ Адель төрөппүттэринээн Дария, Анатолий Гладковтар ыллылар.
Күрэхтэһии кыайыылаахтара Тимофеевтар дьиэ кэргэн «Ийэм, аҕам уонна мин — спорт аргыстаах дьиэ кэргэн» өрөспүүбүлүкэтээҕи күрэхтэһиигэ улууспут чиэһин көмүскүү барар буоллулар. Кинилэргэ ситиһиилэри, кыайыыны баҕарабыт, эрэнэбит.
Оҕону кыра сааһыттан спордунан дьарыктаан күүстээх, сымса, хорсун-ходуот, ыарахантан чаҕыйбат дьон буола улаатарыгар иитиэҕиҥ.
Марианна Сергеева, «Хатыҥчаана» оҕо сайдар киинин аҕа иитээччитэ