Бүгүн СӨ төрүттээбит, уһулуччулаах государственнай-политическай деятель, биир дойдулаахпыт Максим Кирович Аммосов төрөөбүт күнэ нэһилиэгэр – Нам улууһун Хатырыгар киэҥник бэлиэтэннэ. Сүдү киһибит киинэ түспүт Аччыгый Арыытыгар алгысчыт Лоҥхо Өлөксөй аал уоту оттон Алгыс түһэрдэ, мустубуттар кини үрдүк аатыгар сүгүрүйэн-махтанан аастылар. Ол кэнниттэн тэрээһин кыттыылаахтара М.К. Аммосов аатынан СӨ Государственноһын түмэлин иннигэр баар саха норуотун чулуу уолун пааматынньыгар тыыннаах сибэкки дьөрбөтүн уурдулар.
Түмэл уораҕайыгар М.К. Аммосов олоҕун, айар үлэтин биир бастакынан үөрэппит, чинчийбит Кэбээйи улууһуттан төрүттээх Василий Николаевич Гуляев бу күнтөрөөбүтэ 90 сылыгар анаммыт быыстапка үөрүүлээхтик арылынна. Бу быыстапканы Кэбээйи улууһун Куокуй нэһилиэгиттэн кэлбит делегация туруорбут. Василий Николаевич туһунан кини кэргэнэ РФ норуотун үөрэҕириитин туйгуна, РФ уопсай үөрэхтээһинин бочуоттаах үлэһитэ, СӨ норуотун маастара, СӨ култууратын туйгуна, «Гражданскай килбиэн» бэлиэ, «СӨ норуотун уус-уран айымньытын сайыннарыытын иһин» мэтээл хаһаайына Ольга Ивановна Гуляева иһирэхтик аҕынна, Василий Николаевич элбэх архыып докумуонун үөрэтэн, хасыһан олоҕун тиһэх күнүгэр диэри үлэлээбитин бэлиэтээтэ, мэлдьи сибээһи тутар түмэл үлэһиттэригэр, Нам улууһун олохтоохторугар махтанна.
Ураты суолталаах тэрээһиҥҥэ тыл эттилэр, ахтыылары оҥордулар: Наталья Малышева, СӨ национальнай архыыбын дириэктэрин солбуйааччы, Нина Олесова, СӨ култууратын үтүөлээх үлэһитэ, Куокуй нэһилиэгин делегациятын салайааччыта, Василий Соловьев, СӨ үтүөлээх юриһа, РФ суут систиэмэтигэр үтүөлээх үлэтин иһин мэтээл хаһаайына, Россия юстициятын сүбэһитэ, В.Н. Гуляев аҕатынан быраата, Яна Корякина, СӨ үөрэҕириитин туйгуна, СӨ үөрэҕириитин үтүөлээх үлэһитэ, М.К. Аммосов аймахтарын ааттарыттан, Софья Кобякова, Нам улууһун бэтэрээннэрин сэбиэтин бэрэссэдээтэлэ, Олег Николаев, «Хатырык нэһилиэгэ» МТ баһылыгын солбуйааччы, Иннокентий Осипов, үлэ бэтэрээнэ, Саха сирэ-Казахстан-Киргизия-Саха сирэ мотопробег кыттыылааҕа, Александр Кириллин, М.К. Аммосов аатынан СӨ Государственноһын түмэлин сэбиэдиссэйэ. Бу үөрүүлээх тэрээһиҥҥэ ыалдьыттар кинигэ бэлэхтэри, махтал суруктары, сибэкки дьөрбөлөрүн туттулар. Кинилэр илдьэ кэлбит бэйэлэрин сэмэй бэлэхтэрин тэрийээччилэргэ утары ууннулар.
Мустубуттар СӨ национальнай архыып пуондатыттан В.Н. Гуляев олоҕун, айар үлэтин архыып докумуоннарынан виртуальнай быыстапкатын сэргээтилэр. Бу өрөспүүбүлүкэҕэ бастакытын нэһилиэнньэ көрүүтүгэр тахсыбыта бэлиэтэннэ. Оттон Кэбээйи улууһун делегациятын салайааччыта Нина Егоровна көрдөрүүгэ туруоруллубут Василий Николаевич архыыбынай докумуоннарын, үлэлэрин, хаартыскаларын, туттубут малын-салын о.д.а. матырыйааллары, Ольга Ивановнаны кытта сүбэлэһэн баран, СӨ Государственноһын түмэлигэр бэлэхтээтилэр. Өрөспүүбүлүкэбит архыыбын тэрилтэтэ эмиэ бу күн тэриллибитэ ахтылынна. Үс бүк тэҥ үктэллээх тэрээһин буолан ааста.
Касьян Олесов-Олук