СӨ Правительствотын ааспыт 2023 сыллааҕы үлэтин Ким Борисов салайааччылаах бастакы бөлөх Хатырык дьонун-сэргэтин иннигэр отчуоттаата.
Оскуолаҕа улахан өрөмүөн үлэтин ыыппыттарыгар үлэһиттэр, төрөппүттэр, үөрэнээччилэр ааттарыттан махтаналларын биллэрдилэр. Сорох предмет учууталлара хамнас алын кээмэйин ылаллар, ол иһин техническэй үлэһит хамнаһын кытары тэҥ буолбутунан, эдэр учууталлар оскуолаҕа үлэлииллэрэ саарбахтардаах буолан эрэрин эттилэр. Онон кадр өттүгэр, үөрэх кинигэтинэн хааччыллыыга, сыана үрдүү турарынан итии аһылыкка көрүллэр үбү үрдэтиини оскуола директора туруоруста.
Баһаарынай чаас дьиэтэ хаарбах туруктааҕынан, саҥардаары акылаат түһэрбиттэр, салгыы тутууну ыытарга көмө буолалларыгар, хамнастарыгар болҕомто ууралларыгар көрдөстүлэр.
Газ, уот төлөбүрэ үрдүү турарын таһынан, техническэй көрүү өҥөтө хас эмитэ төгүл үрдээбитин норуот туһугар хонтуруоллуулларын, интернет сибээһин тупсарыыны, эдэр ыал дьиэ туттуутугар көрүллэр субсидия олохтоох дьаһалтатыттан бэриллэр бырыһыанын аччатыыны, «Молодежнай» кварталга газ ситимин тардыыны туруорустулар.
Ааспыт сылларга 103 ыал үүт туттарар эбит буолаҕына билигин 7 ыал туттарарын этэн туран, бу сайдыы дуу, кэхтии дуу диэн ыйытыыттан сиэттэрэн үгүс ыйытыыны биэрдилэр.
Промышленнай үлэни ыытыыга нуорманы төһө тутуһалларын, ойуур баһаарын кэнниттэн чөлүгэр түһэриигэ туох үлэни ыыталларын туоһуластылар.
Этии быһыытынан М.К. Аммосов төрөөбүт Аччыгый Арыытыгар суолталаах үлэни ыытар былааннарыгар болҕомто ууралларыгар, оҕо искусствотын оскуолаларыгар преподавателлэринэн хааччыйыыга Музыка үрдүкү оскуолатын кытары үлэ ыытыллыан наадатын эттилэр.
Хатырык олохтоохторо СӨ Правительствотын ааспыт 2023 сыллааҕы үлэтин биир санаанан биһирээтилэр. Өрөспүүбүлүкэ салалтата нэһилиэк сайдыытыгар, социальнай тутуулары ыытарга улахан болҕомто уурбуттарыгар махталларын тиэртилэр.
Семен Аргунов