Партизан хомус куттаах нэһилиэгинэн биллэр. Хоҥкунас тыастаах хомус Бартыһааны аар саарга аатырдыбыт Дмитрий Кривошапкины уонна кини тэрийбит ансамблын ситимниир ансамбыллары тэрийэн нэһилиэк бүтүннүү оонньуур буолбута киһини үөрдэр.
Бүгүн биһиги нэһилиэккэ олус үчүгэй тэрээһин буолан ааста. Кыра оҕолортон кырдьаҕаһыгар диэри ситимниир үс сүһүөх хомус ансамбыллара “Күөрэгэй-45” салайааччы Вера Гаврильева, алын сүһүөх оҕолорго “Үрүйэчээн-35” салайааччы Галина Соловьева. Онтон уһуйаан иитиллээччилэригэр “Сыккыс-35” салайааччы Марфа Захарова.
Күндү ыалдьыттарынан буоллулар, улуус мунньаҕын депутаттарын бэрэссэдээтэлэ Алексей Винокуров, Хомус киинин салааччыта Дмитрий Бестинов, Хомус Уйбаан-Иван Алексеев уонна Николай Жирков.
Уруккуну-хойуккуну кэпсэтэн, инникини былааннаан Хомус ситимэ быстыбатын диэн алгыс этилиннэ. “Күөрэгэй” ансамбль бастакы салайааччытын Матрёна Жиркованы ахтан, махтанан аастылар. Бу күн бастакы күөрэгэйдэр ахтыы оҥорон аастылар. Уруккуттан видеоклип оҥорбуттар. Дьүрүйдүн үйэтэн үйэҕэ алыптаах хомус дорҕооно Тапталлаах Бартыһааммыт сиригэр.
Полина Скрябина