Нам улууһун Бастакы Хомустааҕар «Кыһын Саха сириттэн саҕаланар» бэстибээл чэрчитинэн, күөх харыйа уотун сандаардар күҥҥэ, А.Н. Окоемов аатынан мини-паарка аһыллыбытын туоһулуур лиэнтэни быстылар.
А.Н. Окоемов аатынан мини-паарка РФ Президенэ Владимир Путин көҕүлээбит тиэргэни тупсарыы «Уһук Илиҥҥэ 1000 тиэргэн» федеральнай программанан тутуллубут. Нэһилиэккэ бырайыагы олоххо киллэрэргэ федеральнай бюджеттан 6 мөл. тахса солк. көрүллэн тутуу үлэтин «Виктория плюс» тэрилтэ ыыппыт.
Мини-паарка култуурунай-сырдатар тэрээһиннэр ыытыллар, дьон-сэргэ, оҕо-аймах сынньанар сиринэн буолуоҕа. Паарканы «Алгыс» НАК көрөр-истэр буолуоҕа.
Нам улууһун 1 Хомустааҕар сыл аайы саҥаттан саҥа тутуулар, бырайыактар олоххо киллэриллэн нэһилиэк көстүүтэ лаппа тубуста. Таас дьиэҕэ олорор усулуобуйаны, таһырдьа сибиэһэй салгыҥҥа уопсастыбаннай сынньанар сирдэри көдьүүстээхтик тэрийэллэр.
Семен Аргунов
Хаартыска: Владислав Ушаков