Намнааҕы тыа хаһаайыстыбатын управлениетыгар иһитиннэрбиттэринэн, улууска хортуоппуй, оҕуруот аһын хомуура түмүктэммит. Хортуоппуйу ылыыга быйылгы былаан 4221 т эбит буоллаҕына, алтынньы 2 күнүнээҕи туругунан 3356 т хортуоппуй хостоммут, 1 гектартан ортотунан 69,4 ц үүнүүнү ылбыттар. Оҕуруот аһа 108 гектарга олордуллубут, сыллааҕы былаан 1486 т эбит буоллаҕына, 1509 т үүнүүнү ылбыттар.
— Быйылгы хомуурбут түмүктэннэ, хортуоппуйга былааммытын бэрт кыранан толорботубут, оттон оҕуруот аһын ылыыга былааммытын аһара толордубут. Билигин оҕуруот аһа атыыга дэлэйдик таҕыста. Бөтүҥҥэ Григорий Уваровскай бааһынай хаһаайыстыбата хортуоппуйу, оҕуруот аһын миэстэтигэр атыылыыр уонна тэрилтэлэртэн, биирдиилээн дьонтон сайаапканан тиэрдэн биэрэн батарар. Бу нэһилиэккэ өссө Михаил Сивцев, Ильнар Исмаков о.д.а. хаһаайыстыбаларыттан атыылаһыахха син, онтон Хамаҕаттаҕа Александр Жирков бааһынай хаһаайыстыбата хортуоппуйун, оҕуруотун аһын эмиэ миэстэтигэр уонна сайаапканан атыылыыр. Сорох бааһынай хаһаайыстыбаларбыт сабыылаах тэрилтэлэри кытта дуогабардаһан бэйэлэрин бородууксуйаларынан хааччыйаллар, — диир улуус кылаабынай агронома Сардана Новгородова.
Кини быйылгы сайын уһуннук курааннаан уонна сааскы өттүгэр, сайын саҕаланыыта ардахтаабыта эрээри, нуорматтан кыра сөҥүү түһэн үүнүүнү өлгөмнүк ылыыга охсубутун этэр. Билигин бааһынай хаһаайыстыбалар бородууксуйаларын батарыыга уонна харайыыга үлэлэһэллэр.
Касьян Олесов-Олук