Билэрбит курдук, быйыл Нам улууһугар Оҕо спордун сылынан биллэриллэн, хас биирдии үөрэх уонна уһуйаан тэрилтэлэрэ оҕону эт-хаан өттүнэн дьарыктыырга тустаах сыалы туруоран үлэлэһэллэр. СӨ үөрэҕириитин үтүөлээх учуутала, РСФСР үөрэҕириитин туйгуна, Нам улууһун Бочуоттаах олохтооҕо И.С. Гаврильев сырдык аатынан сылын ахсын чэпчэки атлетикаҕа эстафета ыытыллыбыта номнуо 14 сыла буолла.
Ол курдук, бүгүн, ыам ыйын 17 күнүгэр, А. Игнатьев аатынан «Эҥсиэли» стадионугар И.С. Гаврильев аатынан Намнааҕы 1-кы №-дээх орто оскуола көҕүлээһининэн сааскы эстафета ыытылынна. Бу эстафета үгэскэ кубулуйан, сылын ахсын үөрэх дьыла бүтүүтэ оҕо сыллааҕы дьарыгын көрдөрөр, кыаҕын таһаарар, оҕо спорка дьулуурун көҕүтэр сыаллаах ыытыллар.
Санатан ылар буоллахха, И.С. Гаврильев чэпчэки атлетикаҕа уонна хайыһарга I разрядтаах дэгиттэр спортсмен. 1948 – 1951 сс. Казань куоракка ыытыллыбыт ССРС устудьуоннарын Спартакиадатын кыттыылааҕа. 1952 сыллаахха Саха АССР хайыһарга 100 м муҥутуур кыайыылааҕа. 1953 сыллаахха хайыһарга 18 км II–с миэстэлээх призер. Чэпчэки атлетикаҕа эр дьон хамаандатыгар сылдьан Саха АССР иһигэр 800х400х200х100 м бириэмэлэринэн рекорд олохтоспут сүүрүүк буолар.
Буоларын курдук, эстафетаҕа 1-11 кылаас үөрэнээччилэрэ сүүрдүлэр. И.С. Гаврильев аатынан Нам 1-кы №-дээх орто оскуолата, Н.С. Охлопков аатынан улуустааҕы гимназия, Нам 2-с №-дээх орто оскуолата, И.Е. Винокуров аатынан Хатыҥ Арыы орто оскуолата, Е.С. Сивцев – Таллан Бүрэ аатынан Бөтүҥ орто оскуолалара 11-дии сүүрүүк 1-кы кылаастан 11 кылааска диэри уолаттара, кыргыттара кытыннылар. Оҕолор 100х150х200х300х400х500 м ырааҕы бэйэ-бэйэлэриттэн хаалсыбаттыы кыахтарынан сүүрдүлэр.
Ыҥырыылаах ыалдьыттарынан И. С. Гаврильев сиэннэрэ Алексей Гаврильев, Семен Гаврильев буоллулар, бэйэлэрин дьиэ кэргэннэрин аатыттан анал бириис туруордулар.
Эстафета түмүгэ:
1 миэстэ — Намнааҕы 1 №-дээх орто оскуола.
2 миэстэ — Хатыҥ Арыы оскуолата.
3 миэстэ — улуустааҕы гимназия.
Массаев Алеша (1 кл. НСОШ №2) , Дьячковскай Артем (11 а кл. НСОШ №1) Гаврильевтар дьиэ кэргэн бириистэрин ыллылар.
Иванова Джульетта, 10 в кыл., Дьячковскай Артем, 10 в кыл. И.С. Гаврильев аатынан 1-кы №-дээх орто оскуола физкультура уонна ОБЖ холбоһугун учууталларын бирииһин ыллылар.
Бугаев Дамир, 1 кыл НСОШ №1, Иванова Джульетта, 7 д кыл. Раиса Дмитриевна Негнюрова бирииһин туттулар.
Эһиилги үөрэх дьылын түмүгэр 15 сыллаах үбүлүөйдээх эстафета ыытылларын эттилэр.
Лена Корякина