Билии дойдутун арыйар, сайдыы суолугар сирдиир оскуола барахсан хас сыл ахсын олох киэҥ суолугар үөрэппит оҕолорун атаарар. Бүгүн, ыам ыйын 24 күнүгэр, И.С. Гаврильев аатынан Нам 1-кы №-дээх орто оскуолатыгар “Тиһэх чуораан” чугдаарда.
Хас биирдии оҕо бастакы кылаастан учуутал сылаас илиитигэр киирэн уһуйуллан, үөрэнэн, сайдан, дьулуурданан олоххо талыахтаах идэлэрин чопчу ыраҥалаан көрөргө үөрэнэн тахсаллар. Онуоха кинилэргэ истиҥ сирдьитинэн үөрэтэн кэлбит учууталлара буолаллар.
И.С. Гаврильев аатынан Нам 1-кы №-дээх орто оскуолатын икки 11-с кылаас оҕолоро үөрэнэн бүтэрэллэр. Ол курдук, кылаас салайааччыларынан үлэлээн кэллилэр: 11 “а” кыл. – Лариса Дмитриева Данилова, бастакы категориялаах саха тылын уонна литературатын учуутала; 11 “б” кыл. – Уйгулана Вячеславовна Шарина, бастакы категориялаах математика учуутала. 11 “б” кылааска туйгун сыанаҕа үөрэнэн, 8 оҕо мэтээлгэ дьулуһар.
Истиҥ тылларынан эҕэрдэлээтилэр: Ленскэй нэһилиэк баһылыга Петр Сокольников, А.Ф. Шестаков аатынан улуустааҕы норуот айымньытын киинин директора Николай Жирков, туруорааччы-режиссер Роман Герасимов, Нам улууһун управлениетын начальнигын солбуйааччы Светлана Поротова.
Хаһан баҕар маҥнайгы учуутал оҕо өйүгэр-санаатыгар сүппэт өйдөбүл хаалларар. Ол курдук, оҕолор маҥнайгы учууталлара М.Д. Рожина, Т.Н. Посельская, С.Н. Парникова, М.П. Ноговицына, Л.В. Винокурова, Е.И. Попова эҕэрдэлии кэллилэр. Сылын ахсын буоларын курдук, үрдүк көрдөрүүлээх уонна ситиһиилээх бастыҥ үөрэнээччилэргэ анал стипендиялары туттардылар.
Түмүккэ выпусниктар хоһоон ааҕан, оскуола вальсын үҥкүүлээн учууталларын уонна төрөппүттэрин эҕэрдэлээтилэр, махтаннылар. 11 “а” кылаастан Игорь Куличкин уонна Алина Афанасьева, 11 “б” кылаастан Альмира Бугаева, Айтал Павлов 2023-2024 үөрэх дьылыгар оскуоланы бүтэрээччилэргэ оҕо саас чуораанын бүтэһигин чугдаарда лыҥкынаттылар. Бу кэнниттэн бары сиэттиспитинэн, бүтэһик уруокка – кылаас чааһыгар киирэн үөрэннилэр.
Күндү выпусниктар! Оскуоланы бүтэрэн олох киэҥ аартыгар үктэнэн, санаабыккыт салалла туруохтун, оҥорбуккут олохтонон истин!
Лена Корякина