Муус устар 9 күнүгэр Дьокуускай куорат «Симэх» норуот прикладной искусствотын уонна уус-уран оҥоһуктарын национальнай киинигэр, Намҥа көрдөрүүгэ туруорулла сылдьыбыт, Варвара Иннокентьевна Цыпандина «Иэйиим ситиминэн сиэттэрэн…» оһуор-мандар үлэтэ салгыы киэҥ эйгэҕэ турда. Дьоро күҥҥэ мустубут уран-иис кэрэ эйгэтин кэрэхсээччилэр кини баай-талым үлэтин сэҥээрэ көрдүлэр.
Бэлиэ тэрээһини «Арчы» культурнай киинин салайааччыта Любовь Константинова иилээн-саҕалаан ыытта. Бииртэн-биир ыалдьыты ыҥыран, билиһиннэрэн, эҕэрдэлииргэ тылы биэрдэ. Варвара Иннокентьевнаҕа истиҥ-сылаас эҕэрдэлэрин иккис дойду оҥостубут Мэҥэ Хаҥалас Төҥүлүтүттэн доруобуйаны чэбдигирдэр общественнай түмсүү салайааччыта Надежда Оконешникова, кэргэнин Гаврил Павлович өттүттэн аймахтара, оҕолоро, сиэннэрэ, Дьокуускай куорат Губинскай уокурук ветераннарын сэбиэтин салайааччыта Светлана Степанова, «Үһүс көлүөнэ оскуолатын» салайааччыта Пелагея Колодезникова, «Арчы» киинин иһинэн үлэлиир «Мааны мандар» куруһуок салайааччыта Туяра Александрова, 2 Хомустаах нэһилиэгиттэн төрүттээхтэр куоракка «Старай куорат» түмсүүлэрин салайааччыта Мария Габышева, куоракка олорор биир дойдулаахтарбыт Ольга Готовцева, Мотрена Филиппова, Анна Петрова, Ирина Габышева, 2 Хомустаахтан кэлбит ветераннар сэбиэттэрин салайааччы Надежда Сивцева, Мария Иванова, Лидия Пестрякова уо.д.а. үтүө баҕа санааларын тиэртилэр, сэмэй бэлэхтэрин туттардылар.
Иис мандар үлэтэ элбэх сыраны эрэйэр, бу дьарыкка дьулуур, тулуур, дьүккүөр ирдэнэр. Тыл этээччилэр бу үтүө хаачыстыба Варвара Иннокентьевнаҕа баарын, тикпит оһуор-дьарҕаа үлэтигэр көстөрүн бэлиэтээтилэр, үрдүктүк сыаналаатылар, махталларын тиэртилэр.
Убаастыыр, ытыктыыр киһибит үгүс үтүө дьүөгэлэрдээҕин, доҕоттордооҕун биллибит. «Арчы» дьиэтин иһинэн үлэлиир, бэйэтэ ыллаһар «Чараҥ» ырыа ансаамбыла, баянист Валерий Герасимович Иванов ырыаны аргыс оҥостон ыллыы-туойа сылдьаллара холобурга сылдьар, дууһалыын эдэрдэр.
Уран тарбахтаах Варвара Иннокентьевна билигин бэйэтин сатабылыгар уһуйан куруһуоктары ыытар, маастар-кылаастары көрдөрөр. Өбүгэ саҕаттан илдьэ кэлбит саха үтүө үгэһин көлүөнэттэн-көлүөнэҕэ ситимниир, бэйэтин кылаатын киллэрсэ сылдьар. Кини иис кэнниттэн оҕуруонан араас киэргэли тиһэргэ үөрэппит, өссө биир дьоҕурун арыйбыт ытыктыыр киһитигэр Нина Федотовна Артамоноваҕа махтала муҥура суох эбит. Оттон кини бу быыстапката турарыгар быһаччы көмөлөспүт 2 Хомустаахтан төрүттээх биир дойдулаахпытыгар, билигин А.Е. Кулаковскай аатынан норуоттар доҕордоһууларын Дьиэтигэр симэх, иис-мандар саалатыгар методистыыр Светлана Кириллинаҕа дойдубут дьонун аатыттан улахан махталбытын тиэрдэбит.
Биир дойдулаахтара эриэккэс талааннаах саха Далбар Хотунунан, Варвара Иннокентьевнанан, киэн туттабыт, холобур оҥостобут, өссө да эдэрдии эрчимнээхтик, чэгиэнник этэҥҥэ сылдьан, сөбүлүүр дьарыккын сайыннара, айа-тута сырыт диэн алҕыыбыт!
Лидия Пестрякова, 2 Хомустаах