«Олимпик» спорт оскуоланы бүтэрээччилэр кикбоксиҥҥа республика бастыҥнарынан ааттаналлар. Оскуоланы бүтэрэр оҕо учууталыттан истиҥ сыһыаны, сүбэни-аманы иҥэринэн быһаарыныы ылыныыта — ол кини суолунан барыы. Бу тренер, уһуйааччы оҕону сөптөөх хайысхаҕа туруорбут ситиһиитинэн, сыралаах үлэтинэн ааттанар!
Ол курдук, Дьокуускайга кикбоксиҥҥа Саха сирин чемпионата алтынньы 10-12 күннэригэр ыытыллыбытыгар Нам улууһун олохтоохторо, Габриел Афанасьев уонна Егор Евстафьев ситиһиилээхтик кыттыбыттар. Маҥнайгыларын эр дьоҥҥо күрэхтэһэр Габриел Афанасьев бэйэтин ыйааһыныгар кыайыы өрөгөйүн билбит. Оттон Егор Евстафьев үрүҥ көмүс мэтээл хаһаайына буолбут.
«Габриел Афанасьев оҕолорго Саха сирин уонна Уһук Илин хас да төгүллээх кыайыылааҕа, бириистээх миэстэҕэ тахсан турааччы. 2021 сыл Арассыыйаҕа бастыыр иһин күрэхтэһиигэ боруонса мэтээл хаһаайына.
Егор Евстафьев оҕолорго Саха сирин уонна Уһук Илин хас да төгүллээх кыайыылааҕа, бириистээх миэстэҕэ тахсан турааччы. Инникитин уолаттарбытыгар ситиһиини баҕарабыт», — диэн билиһиннэрэр Юрий Балаганскай.
