Байыаннай дьайыыга сылдьар буойуннарга нэһилиэнньэ өттүттэн көмө уҕараабат. Биир улахан көмөнү Бөтүҥ нэһилиэгин ийэлэрэ, эбээлэрэ Валентина Дмитриевна Макарова салайыытынан оҥороллор.
Ол курдук, бу сыл тохсунньутуттан «Илии сылааһа» өрөспүүбүлүкэтээҕи хамсааһын салаата буолан, үлэлэрин
саҕалаан амарах санаалаах ийэлэр, эбээлэр уопсайа 685 х/б көстүүмнэри, флис көстүүмнэри, нателка, футболка, тактическай ырбаахы, бэргэһэ, кээнчэ, шортик, плащевка көстүүмнэри тикпиттэр.
Күннэтэ кэлэн үлэлиир үтүө санаалаах далбар хотуттар Валентина Макарова, Елена Лукина, Софья Дьяконова, Ольга Афанасьева, Светлана Эверстова, Мария Оконешникова бары баҕа өттүлэринэн иистэнэллэр. Тигиллэр таҥастарын матырыйаалын «Илии сылааһа» Дьокуускайга баар түмсүү хааччыйар. СВО-ҕа сылдьар нэһилиэкпит уолаттара уоппускаларыгар кэлэ сылдьан, үтүө санаалаах иистэнньэҥнэр илиилэрин сылааһынан тигиллибит таҥастары ылан кэтэн, үөрэн-көтөн, махтал тылларын этэн барбыттар.
Хас биирдии комплект СВО-ҕа барааччы кээмэйинэн сөрү-сөп гына тигиллибитин, хайа да фабрика таҥаһыттан итэҕэһэ суох хаачыстыбалааҕын көрөн сөҕөҕүн…
Валентина Дмитриевна салайыытынан далбар хотуттар иистэнэллэрин таһынан, атын иистэниэн баҕалаах ыаллыы сытар Хатырык нэһилиэгин дьахталларын үөрэтэн сүбэ — ама буолбуттар.
Байыаннай дьайыыга сылдьар буойуннарбытыгар этэҥҥэ эргиллэн кэлэллэрин туһугар алгыстаах санааларын,
илиилэрин сылааһын иҥэрэр күндү дьоммутугар махтанабыт!
Валентина Колесова