Нам улууһугар маһынан умсугутуулаахтык дьарыктанар, үлэлиир дьон-сэргэ элбэх. Билиҥҥи кэми кытары тэҥҥэ хардыылыыр, урбаанынан дьарыгырар дьон аҕыйаҕа суохтар. Кинилэр олохтоохторго араас өҥөнү оҥороллор, тус сакааһынан үлэлииллэр. Дьиэ-уот тупсарыгар, сахалыы тыыннанарыгар быһаччы үлэлэһэллэр. Кинилэртэн биирдэстэринэн Ситис Саргын Айталтан буолар.
Бүгүн, ахсынньы 4 күнүгэр, Дойду үрдүнэн Дьиэ кэргэн сылынан Нам улууһугар П.П. Ядрихинскай – Бэдьээлэ аатынан Олоҥхо дьиэтигэр, удьуор мас ууһа Ситис Саргын Айталтан «Үлэм кыһата дойдубар, бар дьоммор» диэн айар быыстапкатын үөрүүлээхтик астылар.
Үөрүүлээх быһыыга-майгыга Нам улууһун депутаттарын сэбиэтин председателэ Алексей Винокуров, улуустааҕы култуура уонна духуобунай сайдыы управлениетын салайааччыта Семен Ядрихинскай, Ленскэй нэһилиэк баһылыгын солбуйааччы Тимофей Охлопков, Олоҥхо дьиэтин дириэктэрэ Вера Колпашникова, Саргын Айталтан аҕата Федор Иванов, уһуйуллааччыта Станислав Андреев эҕэрдэлэрин тириэртилэр, махтал сурук туттардылар. Маһы ыллатар биир идэлээхтэрэ Виктор Стручков, Руслан Захаров, Андрей Осипов, Алексей Федосеев, Архип Слепцов, Виталий Слепцов, Сергей Слепцов, доҕотторо, оскуола үөрэнээччилэрэ, аймахатара, дьиэ кэргэнэ кыттыыны ыллылар.
Саргын Айталтан аҕата Федор Петрович Иванов үлэ бэтэрээнэ, промкомбинакка мас ууһунан үлэлээбит, билигин да уһана сылдьар илиитигэр талааннаах маастар, Россия бочуоттаах донора. Ийэтэ Виктория Егоровна үлэ бэтэрээнэ, Намнааҕы киин балыыһаҕа кассирынан үлэлээбит. Ивановтар дьиэ кэргэн түөрт оҕолоохтор. Бары илиилэригэр талааннаах маастардар буолаллар. Георгий – Гоша ыал улахан уола. 2017 сыллаахха аат иҥэрбит төрөппүттэриттэн көҥүл ылан Ситис Саргын Айталтан диэн сахалыы ааттаммыт.
«Мин 1972 с. Нам улууһун Хатырыгар күн сирин көрбүтүм. Нам орто оскуолатын 8 кылааһын бүтэрэн, Граф Биэрэгэр 2 №-дээх СПТУ-га тракторист-машинист идэтин баһылаабытым. Тэрилтэҕэ бульдозериһынан үлэлии сылдьан, армияҕа сулууспалыы барбытым. Онтон кэлэн баран Райпоҕа таһаҕасчытынан, гранильнай собуокка металлтан оҥоһуктары көннөрөөччүнэн үлэлии сылдьыбытым. 1994 с. олоҕум аргыһын Марианнаны көрсөн ыал буолан, икки оҕолоохпут, үс сиэннээхпит.
Кыра эрдэхпиттэн аҕам үлэтигэр куруутун илдьэ сылдьара. Кини промкомбинакка мас ууһунан үлэлиирэ. Мастарыскыайга сылдьан хайдах туттарын-хаптарын, тугу оҥорорун көрөн, мас сытын эппинэн-хааммынан ылан, билэн улааппытым. Бастакы бэйэм холонуум оҕобор орон, аһыыр остуол, олоппос оҥоруум этэ», — диэн Ситис Саргын Айталтан бэйэтин билиһиннэрдэ.
Саргын Айталтан остуол, олоппос, орон, ыскаап, миэбэл арааһын, туттар сэби-сэбиргэли тиһигин быспакка дьон сакааһынан оҥорор. Мас арааһын, сааһын кистэлэҥин, куурдуу ньымаларын, ыпсарыы ымпыгын-чымпыгын, туттар тэрил уратытын баһылаабыт уус буолар.
Култуура сайдыытыгар кылааттарын иһин, төрүт үгэһи сөргүтэ, харыстыы сылдьалларынан Федор Петрович Ивановка уонна Ситис Саргын Айталтанҥа «Нам улууһун норуотун маастара» бочуоттаах бэлиэ үөрүүлээх быһыыга-майгыга иҥэрилиннэ.
Семен АРГУНОВ