Бүгүн, тохсунньу 11 күнүгэр, Дьокуускай куоракка академик В.П. Ларионов аатынан XXIX өрөспүүбүлүкэтээҕи эдэр чинчийээччилэр «Инникигэ хардыы» национальнай конференция-куонкурустара түмүктэннэ.
Үс күн устата өрөспүүбүлүкэ үрдүнэн барыта 1600-тан тахса оҕо 44 секциянан бэйэлэрин чинчийиилэрин билиһиннэрдилэр, дакылааттарын аахтылар, көмүскээтилэр.
Нам улуустааҕы үөрэх управлениетыгар иһитиннэрбиттэринэн, бу НПК-ҕа Нам улууһун 14 оскуолатыттан, З.А. Тихонова аатынан Намнааҕы оҕо эйгэтин Түөлбэтиттэн барыта 66 оҕо кыттыыны ылбыт.
II этапка ааспыт үөрэнээччилэртэн 41 оҕо ситиһиилээхтик кытынна. Ол курдук, Партизан орто оскуолатын 9 кыл. үөрэнээччитэ Влада Андросова «Муода уонна дизайн», Нам 2 №-дээх орто оскуолатын 5 кылааһын үөрэнээччитэ Иосиф Федоров «Общественнай наукалар» секцияларга кыттан, «Юниор» лауреатын үрдүк аатын ылан, дипломнарынан, мэтээллэринэн наҕараадаланнылар.
11 оҕо 2 ст. дипломант, 12 оҕо 3 ст. дипломант буолары ситиһэн, дипломнарынан бэлиэтэннилэр.
В.П. Артамонов аатынан Хамаҕатта саха-француз лиссиэйин 6 кылааһын үөрэнээччитэ Дьяконова Дита «Математическай наукалар» секцияҕа кыттан, «Общественнай талыы» күрэҕин анал бирииһин – “СӨ Үүнэр көлүөнэтин” целевой фондатын, онтон 6 “в” кылаас үөрэнээччитэ Романова Намыына, салайааччыта Күннэй Иннокентьевна Корякина көҕүлээһининэн оҥорбут үлэтинэн «Общественный выбор» күрэҕин анал бирииһин — «Технопарк» ГАУ аатыттан үөрүүлээх быһыыга-майгыга махтал суруктары, бэлэхтэри туттулар. Ити курдук үлэлэрэ үрдүктүк сыаналанан, сэҥээриини ылбыт оҕолор араас наҕараадалары тутан, үөрдүлэр-көттүлэр. 15 үөрэнээччи Бүтүн Россиятааҕы конференцияларга, фестивалларга, форумнарга кыттарга мэктиэлэммит.
Үөрэнээччилэри, кинилэр салайааччыларын үрдүк ситиһиилэринэн эҕэрдэлиибит, инникитин соргулаах түһүлгэни баҕарабыт!
“Эҥсиэли” хаһыат.