Нам сэлиэнньэтин “Ипподром” түөлбэ актива, олохтоохторо сайаҕас санаа аргыстаах, кэрэ санаа доҕордоох көмүс күҺүммүт кэрэ күнүгэр бастыҥ стелабытыгар мустан бииргэ буоллубут, үөрүүлээх түгэннэрбитин, ситиһиилэрбитин бэлиэтээтибит.
Тэрээһиммитин сэргэх тэтимнээхтик Михайлова Татьяна Васильевна салайан ыытта. Ленскэй нэһилиэк олохтоох дьаһалтатыттан Иванова Полина Дмитриевна оскуолаҕа үөрэх дьыла саҕаланан эрэринэн эҕэрдэлээтэ уонна “Ипподром” түөлбэ көхтөөх олохтоохторугар Екатерина, Михаил Павловтар дьиэ кэргэттэригэр уонна Кира Кировна Аммосоваҕа олохтоох дьаһалта аатыттан грамоталары туттарда.
Тэрээһин саҕаланыыта Аммосова Кира Кировна быйыл оскуолаҕа киирэр оҕолорбутугар эҕэрдэ тыл эттэ, бэлэхтэри туттарда. Оскуола олоҕор быйылгыттан киириэхтээх Павлов Ярик махталын биллэрэн хоһоон ааҕан барыбытын үөртэ. Ону тэҥэ, Лариса Петровна ХИФУ-ну кыһыл көмүс дипломунан бүтэрбит түөлбэбит кыыһыгар Маттананова Алинаны эҕэрдэлээн махтал сурук туттарда. Оттон 2024 сылга оскуоланы үрүҥ көмүс мэтээлинэн бүтэрбиттэргэ старосталар М.Н. Брызгалова уонна Л.Н. Григорьева инникитин элбэх ситиһиилэри баҕаран туран Николаева Каринаҕа уонна Павлов Айталга махтал суруктары туттардылар.
Түөлбэ салайааччыта Осипова Татьяна Иннокентьевна көмүс күһүн кэлбитинэн, билии күнэ чугаһаабытынан эҕэрдэ бастыҥын анаата. Араас хайысхалаах үлэлэр, бэлиэ күннэр тэтимнээхтик ыытыллалларыгар олохтоохторго, активка махтанна. Үөрүүлээх күммүтүгэр Татьяна Иннокентьевна “Ипподром” түөлбэ бочуоттаах олохтооҕо” үрдүк ааты В.С. Эверстоваҕа уонна А.В. Дьяконоваҕа туттарда.
Түөлбэбитигэр үтүө үгэскэ кубулуйбут “Күһүҥҥү мин тиэргэним” диэн ыаллар тиэргэннэрин көрүү түмүгүнэн, Намҥа биллэр оҕуруотчут Решетникова Лариса Петровна бастыҥнарга анал ааттары туттартаата туттартаата.
Ол курдук, “Өлгөм баай астаах тиэргэн” анал аатынан элбэх оҕо ийэтэ, эбэтэ Матвеева Клара Иннокентьевна наҕараадаланна. Клара Иннокентьевна дэлэй үүнээйитин көрөн кһи хараҕа сымныыр. Үүнээйини ис сүрэҕиттэн үүннэрэрэ, бүөбэйдиирэ помидордара аһын уйбакка сыппыттарыттан, оҕурсута, биэрэһэ, сибэкки арааһа элбэҕиттэн тута билэр.
“Кэрэ сибэккинэн симэммит тиэргэн” анал аат хаһаайкатынан Павлова Сардаана Михайловна ааттанар. Араастаан олордуллубут сибэккилэрдээх сири киһи астынар көрөр тиэргэнэ буолан таҕыста.
“Баай дьэдьэннээх тиэргэннээх” хаһаайканан Павлова Харитина Николаевна буолла. Хаһаайка тиэргэнин наһаа ыраастык тутан-хабан олорор – үүнээйи силигилии үүммүтэ, теплицаҕа үгүс дьэдьэн, клубника ситэн хомулларын күүтэн турарга дылы.
“Сиэдэрэй тиэргэн” анал ааты Степанова Александра Алексеевна ылла. Дьэ, сиэдэрэй олбуор дэниэн дэммит. Оҕолорго анал оонньуур, сөтүөлүүр, остуол, бары-барыта баар. Холобура, киһи дуоһуйа сынньанар, сибиэһэй салгынынан тыынар сайыҥҥы беседкалара сиэдэрэйдик оҥоһуллубут. Кинилэр тиэргэннэригэр силигилии үүммүт арбус, дыня үүнээйилэри көрүөххэ сөп.
Дьэ, бу курдук бары түмсэн күһүҥҥү киһи күлбүтүнэн бэртээхэй тэрээһиммитин ыыттыбыт.
“Ипподром” түөлбэ актива