Бүгүн «Нам улууһа» МТ 2023 сыллааҕы үлэтин отчуоттуур улуус баһылыгын э.т. Анатолий Павлов салайааччылаах бастакы бөлөх Искраҕа сырытта.
Улуус депутаттарын сэбиэтин ааспыт сыллааҕы үлэтин Владимир Соловьев, 2023 с. байыаннай дьайыы кыттыылаахтарыгар төһө көмө оҥорбуттарын, иккитэ командировкаҕа баран кэлбиттэрин туһунан «Буойун» түмсүү председателэ Павел Оконешников сырдаттылар.
Отчуот кэнниттэн Анатолий Иванович ааспыт сыллааҕы боротокуолга киирбит туруорсуулар төһөтө туолбуттарын иһитиннэрдэ.
Бу да сырыыга киин балыыһаҕа сүрэх, харах быраастара тоҕо суохтара интэриэһиргэттэ.
Тыа сиригэр толору хааччыллыылаах дьиэ тутуллара үксээтэ, ол эрээри убаҕас тобоҕу оботторор уонна уу куттарар улахан кыһалҕа буолан турарын этиннилэр.
Нэһилиэккэ урут уруккуттан уу кыһалҕата турар, онон күөлү дириҥэтии үлэтин тула кэпсэтиһии буолла. Итиэннэ Нам-Искра суолун өрөмүөннүүрү туруорустулар.
Тыа хаһаайыстыбатын салаатыгар, сүөһү ахсаанын сылынан тэҥнээн көрөн иһитиннэрэллэрэ буоллар диэн этиини киллэрдилэр. «Эрэл» ТХПК үүтү хаһааҥҥыттан тутан саҕалыырын ыйыттылар. Онуоха директор Нюргун Гуляев олохтоохтор төрүөхтэрэ бүтэн, үүппүт дэлэйдэ, бэлэм буоллубут диэтигит да собуоту үлэлэтэргэ бэлэммит диэн хоруйдаата. «Дьиэ кэргэн экономикатын сайыннарыы» программатын сэргииллэрин, туһаналларын эттилэр.
Нэһилиэк депутата, элбэх оҕолоох ийэ 25 миэстэлээх оҕо саадын тутуута салгыы хаһан саҕаланарын ыйытта.
Оскуола материальнай баазата эргэрбитин эттилэр, көрүллэр үп учебник эрэ сакааһыгар тиийэрин этэн туран, миэбэл ыларга үп көрөллөрүгэр туруорустулар.
Иннокентий Рожин: «Кэҥкэмэттэн уу аҕалар элбэх үбү, тэрили эрэйэр буолуохтаах. Ол оннугар саҥа уу баһар массыына ыллахха нэһилиэги хааччыйар кыах баар.
Үүт үлэттэн кэлэр. Ынаҕы тохсунньуга төрүүр гына эрдэ буоһатан, сылы эргиччи ыырбыт буоллар үүт былаана түспэккэ таһыччы барыа этэ».
Искра олохтоохторо «Нам улууһа» МТ дьаһалтатын ааспыт 2023 сыллааҕы үлэтин биһирээтилэр.
Семен Аргунов