Хатырык орто оскуолатын 55 сыл анараа өттүгэр бүтэрбит выпускниктар үөрэммит оскуолабытыгар мустан, быйыл оскуоланы бүтэрэр үөрэнээччилэри кытта профориентация чэрчитинэн көрүстүбүт. Биһиги выпуска кыырай халлаанынан көтөр летчик, айар тутар тутуу инженердэрэ, ис дьыала үлэһиттэрэ, аар айылҕаны араҥаччылыыр егерь, дьон доруобуйатын көрөр-истэр быраас, суот-отчуот үлэһиттэрэ, ветеринар быраастар, Почта России үлэһитэ, хамсаабат баайы — сирбитин көрөр-истэр кадастровай палата бас-көс үлэһитэ, сиринэн сүүрэр техника механиктара, культура үлэһиттэрэ уонна кэнчээри ыччаты иитэр учууталлар бу оскуолаттан кынат үүннэрэн тахсыбыттара. Сорохторбут сынньалаҥҥа, сорохторбут билигин да үлэлии сылдьабыт.
Хас биирдии ыалдьыт оскуолаҕа үөрэммит сылларын, талан ылбыт идэтинэн үлэлээн тугу ситиспитин кэпсээбитин оҕолор бэрт болҕомтолоохтук иһиттилэр, биһирээн ытыс тыаһын бэлэхтээтилэр. Үөрэнээччилэр бэрт үчүгэйдик эбэлэриттэн, эһэлэриттэн саҕалаан истиҥник уу сахалыы бэйэлэрин билиһиннэрбиттэрэ биһиэхэ, саастаах дьоҥҥо, күндүтүк иһилиннэ, билэр дьоммут сиэннэрэ буолалларын истэн күө-дьаа буолан ахтан-санаан аастыбыт.
Оҕолорго ситиһиилээх, үөрэхтээх, билиилээх дьон буолалларыгар кэс тылбытын эттибит. Оскуолабыт библиотекатыгар кинигэ наборун бэлэх ууннубут. Кылаас салайааччыта Екатерина Спартаковна үөрэ-көтө көрсөн, кылаас аатыттан минньигэс тордунан күндүлээтилэр. 55 сыллаах үбүлүөйбүтүнэн өссө да кэлэ сылдьыахпыт диэн бу бэртээхэй көрсүһүүнү түмүктээтибит.
Марита Сивцева