Бүгүн «Нам улууһа» МТ 2023 сыллааҕы отчуота улуус баһылыгын э.т. Анатолий Павлов салайааччылаах 1-кы бөлөҕө күн иккис аҥарыгар Көбөкөн нэһилиэгэр отчуоттаата.
Анатолий Иванович ааспыт сыллааҕы туруорсуулары ырытта, туох үлэтэ ыытыллыбытын, ыытылла сылдьарын туһунан сиһилии сырдатта.
2 Хомустаахха диэри суолу оҥорууга икки улуус сүбэлэһэн транспорт министерствотыгар үлэ ыытылла турарын иһиттиннэрдэ. «Үтүө дьыала» хамсааһынынан 6 квартиралаах дьиэ тутуллара былааҥҥа киирбит. Интернат өрөмүөннэнэр буолбут.
Улуус депутаттарын сэбиэтин үлэтин Семен Ядрихинскай сиһилии сырдатта.
Полиция участковайа Нюргуяна Карамзина нэһилиэккэ буруйу оҥоруу ахсаана эбиллибитин этэн туран, ааспыт сыллаахха буолуталаабыт быһылааннары иһитиннэрдэ.
Үөрэх салаатыгар тохсунньу ыйдааҕы хамнас хаһан кэлэрин туоһуластылар, оскуола тутуллуутун, ханнык таһымҥа сылдьарын, аптека аһыллыытын ыйыттылар. Олохтоохтор аптека үлэлиирин күүскэ туруорустулар. Онуоха кылаабынай быраас 4 кварталга аһыллыаҕа диэн эрэннэрдэ. Амбулаторияны өрөмүөннүүллэрин, саҥа миэбэл, тэрил ылалларын эттэ.
Сир арендатын туһунан, «НКТЭ» АО Көбөкөннөөҕү учаастогын маастара чох бүтэн эрэрин этэн туран, улахан массыыналар сылдьалларыгар мууһу халыҥатар үлэни ыытары туруоруста.
Тыа хаһаайыстыбатын специалиһа Ростелеком сибээһин линията сиргэ түһэн сытарын уонна остуолбалары хомуйтарары, дьиэ кэргэн экономикатын сайыннарыы программатыгар дьиэ кыылын испииһэгэр ньирэй атыылаһыытын киллэрэри туруоруста.
Билигин Өлүөнэ муостатын тутуута саҕаланыаҕа, оччоҕо уубут хаачыстыбатын тупсарар ууну ыраастыыр станция туруоруллуутун туоһуластылар. «Культура салаатыгар үөрэххэ киириигэ целевой миэстэ баар дуо?» — учуутал Мария Сокольникова ыйытта.
Үөрэх эйгэтин үлэһиттэригэр олох-дьаһах өҥөтүн төлөбүрүн толуйуута тоҕо үрдээбэтин сурастылар.
Квартальнай хочуолунайга биир оһох тэстибит, инникитин хочуолу уларытары, итиэннэ эбии хочуолунай тутары, Маймаҕаттан өрүскэ киирэр суолу өрөмүөннүүрү эттилэр. Сынньалаҥ кииҥҥэ капитальнай өрөмүөн хаһан ыытылларын ыйыттылар.
Оскуола сынньалаҥ киинигэр көһөрөллөрүн боппуруоһа сытыытык турар эбит.
Республика таһымнаах суолга уоту тэйитэр тэрили элбэтэллэрэ буоллар диэн санааларын тириэртилэр. Социальнай хантараакка аккаас кэлэр түгэнигэр биричиинэтин ыйалларын эттилэр. Биэнсийэлээхтэр уонна кырдьаҕас дьон сэбиэтин бэрэссэдээтэлэ санаторийга баралларыгар көрүллэр чэпчэтиилэри ыйытта.
Интернат өрөмүөнүгэр эбии кырыыһатын уларытыыны киллэрэри, сайыҥҥы оҕо сынньалаҥар лааҕыры тэрийэллэрин, оскуола музейыгар толору штат көрөллөрүгэр. Спорт салаатыгар комплекснай спартакиадаҕа биир көрүҥ үс түһүмэхтэммитин табыгаһа суох диэн санааларын тириэртилэр.
Көбөкөн нэһилиэгин олохтоохторо улуус дьаһалтатын ааспыт сыллааҕы үлэтин биһирииллэрин биллэрдилэр.
Семен Аргунов