Биһиги күндү киһибит Мария Семеновна Баишева, эдэр сааспыт тапталлаах дьүөгэлээтэр дьүөгэтэ, биһиги Манябыт, Арыйаанабыт күн сириттэн барбыта үс сыла буола оҕустаҕа түргэнин…
Үксүбүт атын улуустарынан олорон, сүүрбэччэлээх сааспытыттан көрсүспэтэх буолан, өйбүтүгэр-сүрэхпитигэр эдэркээн, чаҕылхай комсомолка кыысчаан, наар үөрэ-көтө, кэпсии-ипсии сылдьара, «5» нүөмэрдээх футболкалаах «Пятерочка» диэн хос ааттаныар диэри мээчик тутан баран, имигэстик элээрдэ сылдьара, кыайыы үөрүүлэнэн астыммыт дьүһүнэ, сааһыран да баран, спортивнай олохтон туораабакка, скандинавскайдыы сылдьан хаарга шпагат түһэн турара, кэнсиэр аайы үчүгэй да бөҕөтүк үҥкүүлээн элээрдэ сылдьара, субуотунньук буоллун, туох ыытыллар тэрээһиҥҥэ барытыгар биир бастакы буолара, инники сылдьара, кини кэрэ киһибит, үчүгэй дьүөгэбит буолан өйбүтүгэр-санаабытыгар хаалла. Туохха барытыгар эйэҕэс сыһыанын, элэккэй, бэһиэлэй майгытын, өрүү сүбэлии, көмөлөһө сылдьарын барытын муста түстэрбит эрэ ахтан-санаан ылабыт.
Биһиги Манябыт дьоһун олоҕор кэргэнин Кэскилин, оҕолорун, сиэннэрин, хос сиэннэрин тапталларын, олох дьолун, ыччакка анаабыт үлэтин ситиһиилэрин үөрүүтүн барытын билэн барда. Күндү дьүөгэбит сырдык мөссүөнэ биһиги өйбүтүттэн сүппэт, муста түстүбүт да кинини ахтабыт, суохтуубут, саныыбыт.
Кини олоҕун салгыыр тапталлаах оҕолоро, сиэннэрэ, хос сиэннэрэ ийэлэрин, эбэлэрин, хос эбэлэрин аатын ааттата, кини аатынан киэн тутта сырыттыннар.
Дьокуускайга ЯПУ-1 бииргэ үөрэммит дьүөгэлэрэ