Нам улууһун Салбаҥ, 2 Хомустаах уонна «Түөлбэ» оҕо киинэ өрөспүүбүлүкэтээҕи үөрэх-производство бастыҥ хаһаайыстыбатын быһаарар конкурска кыттан, бастыҥ миэстэлэри ылары ситистилэр.
Бу дьыл алтынньытыгар СӨ үөрэҕин уонна наукатын министерствотын үлэтин былаанынан уонна «Юные якутяне» өрөспүүбүлүкэтээҕи киин тэрээһининэн «Лучшее учебно-производственное хозяйство» диэн кэтэхтэн конкурс ыытыллыбыта. Конкурска Нам улууһуттан Е.М. Ларионов аатынан Салбаҥ, Е.П. Сивцев аатынан 2 Хомустаах орто оскуолатын уонна З.А. Тихонова аатынан «Түөлбэ» оҕо киинин бизнес-инкубатордара кыттыыны ылбыттара. Экспертнэй комиссия быһаарыытынан оскуолаларга «Лучшее учебно-производственное хозяйство в животноводстве» номинацияҕа кыайыылааҕынан Салбаҥ орто оскуолата ааттанна. Оттон «Лучшее учебно-производственное хозяйство в растениеводстве» 2 Хомустаах оскуолата бочуоттаах иккис миэстэни ылары ситистэ. Эбии үөрэхтээһин тэрилтэлэрин ортотугар «Лучшее учебно-производственное хозяйство в растениеводстве» номинацияҕа «Түөлбэ» оҕо киинэ иккис миэстэни ылла. Бу туһунан Нам улууһун үөрэҕин управлениета иһитиннэрдэ.
Ааспыт 2022 сыллаах конкурска Нам улууһуттан бастакынан З.А. Тихонова аатынан «Түөлбэ» оҕо киинэ кыттыбыта. 27 кыттааччыттан бочуоттаах иккис миэстэни ылары ситиспитэ.
Сүөһү иитиитин, үүнээйи олордуутун, көрүүтүн-харайыытын оскуола паартатыттан үөрэтэн саҕалыыр үөрэх тэрилтэлэрин бастыҥ уопута атыттарга холобур буоллун.
Лена НОГОВИЦЫНА