Арбын нэһилиэгэр Арассыыйаҕа Аҕа дойду Геройдарын күнүгэр, “Тускул” култуура киинигэр оскуола оҕолоругар анаан «Киэн туттабыт кинилэр ааттарынан!» диэн билиһиннэрэр-өйдөтөр сыаллаах тэрээһин ыытылынна.
Арассыыйа судаарыстыбата тэриллиэҕиттэн билиҥҥи кэмҥэ диэри биһиги дойдубут героическай историята киэҥ. Арассыыйа норуота ханнык да өстөөххө бэриммэккэ дойдубут көҥүлүн иһин хорсуннук турунан Аҕа дойдутун көмүскээбитэ. Кинилэр олохторо кэнчээри ыччаппытыгар Дойдуга бэриниилээх буолуу, Ийэ дойдуга таптал холобурунан буолаллар. Бу күн Арассыыйа, Сэбиэскэй Сойуус Дьоруойдарын, Сибэтиэй Георгий Уордьан уонна Албан Аат Уордьан кавалердарын чиэстииллэр.
Оҕолорго нэһилиэкпититтэн төрүттээх биир дойдулаахтарбыт: Аҕа дойду уоттаах сэриитигэр 1941-1945 сылларга “Кыһыл Сулус” уордьанынан Иннокентий Николаевич Иванов, Аҕа дойду сэриитин I степеннээх уордьанынан Илья Петрович Соловьев, III степеннээх “Слава” уордьанынан Прокопий Иннокентьевич Иванов наҕараадалаах сэрии бэтэрээннэрин тустарынан О.Н. Соловьева билиһиннэрдэ. Онтон билиҥҥи төрөөбүт дойдубут көҥүлүн уонна кэскилин, кырдьык уонна эйэ иһин байыаннай дьайыы тоҕус Саха сирин Геройдарын тустарынан А.Н. Иванова, С.О. Корякина, В.Д. Попова кэпсээтилэр.
Саха сирэ – күүстээх санаалаах , хорсун дьон дойдута. Буойун дьоммут төрөөбүт дойдуга муҥура суох бэриниилэрэ , сахалыы сэмэй майгылара, сатабыллара, инникигэ эрэллэрэ үтүө холобур буоллун диэн биир дойдулаахтарбыт Серкин Александр Николаевич, Колесов Вячеслав Саввич тустарынан видеосюжет көрдөрүүтэ буолла. Оскуола улахан кылаас үөрэнээччилэрин толорууларыгар Н. Андросов мелодиятыгар «Кыайыы тыыннаах Алеша» ырыанан тэрээһиммит түмүктэннэ.
Арбын пресс-сулууспата