Нам улууһугар, кулун тутар 26-27 күннэригэр, Нь.С. Тимофеев аатынан спорт комплексыгар «Спортивные якутяне» үөрэнээччилэр спартакиадаларын зачетугар киирэр «Сааскы Эҥсиэли» кикбоксиҥҥа Саха сиригэр бастыыр иһин күрэхтэһии түмүктэннэ.
Эппиэтинэстээх, инники эрэлгэ угуйар күрэхтэһиигэ 2010-2012 с.т. уонна 2013-2015 с.т. уолаттар 10 ыйааһыҥҥа уопсайа — 160 кэскиллээх кикбоксер 14 улуустан кэлэн кииристилэр. Сүрүн судьуйанан российскай категориялаах судьуйа Иван Марков үлэлээтэ.
Икки күннээх тыҥааһыннаах киирсиигэ оҕолор дьарыктаахтарын, инникигэ эрэллээхтэрин, тулуурдаахтарын, кыайыыга дьулуурдаахтарын сэргии, сөҕө көрдүбүт. Тренердэр үлэлэрин таһыма, иитиллээччилэригэр сыһыаннара, ис сүрэхтэриттэн ыалдьаллара, ыйан-кэрдэн, сүбэлээн биэрэллэрэ дьарыктыыр оҕолоругар сэниэлэригэр сэниэ, күүстэригэр күүс эбэрэ чахчы.
Нам улууһуттан 35 кэскиллээх, инникилээх спортсмен оҕолор кыттан бириистээх миэстэлэргэ тигистилэр. «Сааскы Эҥсиэли» кикбоксаҕа миэстэлэспиттэр бэс ыйын 5-9 күннэригэр Нам улууһугар ыытыллыахтаах «Спортивные якутяне» өрөспүүбүлүкэтээҕи үөрэнээччилэр спартакиадаларыгар кыттарга салгыы дьарыгы, сүүмэрдээһини ааһыахтара.
Семен Аргунов