Бүгүн, кулун тутар 4 күнүгэр, Ржев куорат ньиэмэс халабырдьыттарыттан босхоломмута 81 сылынан, Нам сэлиэнньэтин Ржев скверигэр митинг ыытылынна. Тэрээһини көҕүлээччи Нам 2-с №-дээх орто оскуолатын «Полярная звезда» поисковай бөлөх салайааччыта Ирина Григорьева куруһуогар сылдьар оҕолорун кытта кыттыыны ыллылар, П.П. Ядрихинскай-Бэдьээлэ аатынан Намнааҕы «Олоҥхо дьиэтин» специалистара иилээн-саҕалаан ыыттылар.
«Ленскэй нэһилиэк» МТ баһылыга Петр Сокольников, Нам улууһун ветераннарын сэбиэтин бэрэссэдээтэлэ Софья Кобякова, М.К. Аммосов аатынан СӨ государственноһын түмэлин директора Александр Кириллин өйдөбүнньүк тыллары эттилэр. Митинг бүтүүтэ сквергэ гвоздика сибэкки уурдулар, курутуйуу мүнүүтэтэ биллэрилиннэ.
Кылгастык санатар буоллахха, дойдубут тэбэр сүрэҕин — Москва куораты ылаары Адольф Гитлер 48 дивизияттан, ол иһигэр 7 моторизованнай, 9 танковай дивизияттан турар «Группа армий “Центр” дэнэр саамай сүрүн күүстэрин үс гыммыт иккитин Ржев хайысхатыгар кимэн киллэрбит эбит. Ити кыргыһыылары салайсыбыт Сэбиэскэй Сойуус маршала В.Г. Куликов этэринэн, Ржев-Вязьма кыргыс хонууларыгар 2 мөлүйүөн 60 тыһыынча Кыһыл Армия саллааттарын, сержаннарын, офицердарын сүтэрбит. Олор истэригэр 2 тыһыынчаттан тахса саха буойуна Ржев анныгар охтубут. Ким да умнуллубат, туох да умнуллубат!
Лена Корякина