Олунньу 11 күнүгэр, Нам улууһун култууратын үлэһиттэрин идэлээх сойууһун кэмитиэтин тэрийиитинэн, киин уонна илин эҥэр оройуоннар өрөспүүбүлүкэтээҕи XIII спартакиадатыгар волейболга хамаанда сүүмэрдиир сыаллаах-соруктаах ыытылынна.
М.К. Аммосов аатынан Хатырыктааҕы элбэх функциялаах киин спорт саалатыгар волейбол балаһаакката 70-ча киһини түмтэ. Уопсайа 9 хамаанда мустан сиэккэ нөҥүө тирии мээчиги кыыраттылар. Сүүмэрдэммит хамаандалар: «Үрдэл» — улуустааҕы култуура уонна духуобунай сайдыы управлениета, П.П. Ядрихинскай аатынан Олоҥхо дьиэтэ, «Эҥсиэли» редакция; «А. Шестаков кынаттара» — А.Ф. Шестаков аатынан улуустааҕы НАДь; «Илин эҥэрдэр» — Көбөкөн, 2 Хомустаах, Түбэ СК; «Музееведы» музей үлэһиттэрин, кииннэммит библиотечнай ситим, оҕо искусствотын оскуолаларын сүүмэрдэммит хамаандалара, «Үрдэл» — Аппааны, Бөтүҥ; «Южный» — Партизан, 1 Хомустаах; Хатырык-Модут СК сүүмэрдэммит хамаандата.
Культура үлэһиттэрэ спортка да дьоҕурдаахтара, интэриэстээхтэрэ көһүннэ. Олус тыҥааһыннаах, ыһыылаах-хаһыылаах оонньуулар буоллулар. Түмүк көрсүһүүлэргэ «Илин эҥэр» хамаанда музей үлэһиттэрин кыайан 3-с миэстэ буоллулар. «Үрдэл» хамаанда Хатырык – Модут сүүмэрдэммит хамаандатын кытта тыҥааһыннаах оонньуу түмүгүнэн 2-с миэстэ буоллулар. Хатырык-Модут хамаандата 1-кы миэстэ буолары ситистилэр.
2-с миэстэ
1-кы миэстэ
3-с миэстэ
«Култуура эйгэтин үлэһиттэрин ырыанан, хоһоонунан, кэнсиэринэн эрэ «олороллор» дии саныыр эбит буоллахтарына, спортка дьоҕурдаахтарын дьон-сэргэ көрөн сөхтө. Өрө күүрүүлээх, күүстээх оонньуулар 12 чаас устата барда. Чахчы даҕаны дэгиттэр идэлээхпитин, үлэлээхпитин бу спорт да өттүгэр көрдөрдүбүт.
Бииртэн биир көтөр кынаттаах кэриэтэ оонньооччу мээчиги күөрэтэн, охсон лүҥкүнэтэн, тиритии-хорутуу, охтон ыла-ыла ойон туран, ойуоккалаан, хас биирдии хамаанда биир соругунан мээчиги түһэрбэккэ буола сатаан кыайыыга дьулуурдарын көрдөрдүлэр. Председателбит Александра Парникова эппитин курдук: ким бэлэмнээх – ол кыайыы үөрүүтүнэн өрөгөйдөөтө.
Көрөөччүлэргэ, биир идэлээхтэригэр умнуллубат кэрэ оонньуулары көрдөрдүлэр. Холобур оҥостон, кэпсэлгэ сылдьар биир идэлээх спортсменнарбытынан киэн туттабыт. Аны сайын буолар өрөспүүбүлүкэтээҕи култуура үлэһиттэрин спартакиадатыгар волейболга Нам улууһун чиэһин көмүскүүргэ мэктиэ туппут чөмпүйүөннэрбитигэр күүстээх бэлэмнэниини баҕарабын», — диэн «А. Шестаков кынаттара» хамаанда оонньооччута, култуура үлэһиттэрин улуустааҕы союһун кэмитиэтин чилиэнэ Алтыына Шапошникова санаатын үллэһиннэ.
Киин уонна илин эҥэр оройуоннар култуура эйгэтин үлэһиттэрин өрөспүүбүлүкэтээҕи XIII спартакиадата бэс ыйын 30 — от ыйын 2 күннэригэр Нам улууһугар ыытыллар. Биэс спорт көрүҥэр күрэхтэһиэхтэрэ, икки культурнай айар-тутар куонкурустар баар буолуохтара. Инникитин Нам улууһун чиэһин көмүскүүргэ хамаанда сүүмэрдиир күрэхтэһиилэрэ ыытыллаллара былааннанар.
Семен Аргунов