Нам суоппардарыгар бүгүн ГАИ үлэһиттэрэ “eCOnam” сервиснэй этэрээт оҕолорун кытта “Сохраните наши сердца” диэн акция тэрийдилэр.
Ленскэй нэһилиэк олохтоох дьаһалтата үлэлэтэр “eCOnam” сервиснэй этэрээт оҕолоро суоппардарга “уруулга итирик туруктаах олорума” диэн ис хоһооннонон сүрэххэ ойууламмыт илиистэри түҥэттилэр. Оскуола үөрэнээччилэрэ массыына киһиэхэ оонньуур буолбатаҕын этэр, суолга сэрэхтээх буолары кэпсиир суол бэлиэлэрин туттулар.
ГАИ инспектордара оскуола үөрэнээччилэригэр үгүһү кэпсиир ис хоһоонноох акциялары, тэрээһиннэри урут-уруккуттан ыыталларын инспектор Ольга Павлова этэр. Бүгүҥҥү күҥҥэ саҥаттан-саҥа суол быраабылата тахсарынан, суол кыттыылаахтара быраабылалары үөрэтэллэрэ ирдэнэр. Билигин хас биирдиибит массыыналаах диэбиккэ диэри, техника элбээбитинэн суолга булгуччу болҕомтолоохтук ыытыахха наада.
“Суоппардар бэйэ-бэйэлэригэр убаастабыллаахтык сыһыаннаһаллара – улахан кыайыы буолуо этэ. Өйдөспөт быһыы-майгы киһи хайдах быһыылаахтык туттарыттан-хаптарыттан, сиэриттэн-майгытыттан улахан тутулуктаах. Онон, суоппардарга этэрим биир, сиэрдээх буолуохха наада!” – диир Ольга Александровна.
Харысхан Попов, Айсен Федоров