Сэрии сылын оҕото Январь Николаевич Протопопов — Хамаҕатта олохтоох библиотекатын аҕам саастаах ааҕааччыларыттан биир бастыҥнара. Ордук саха классик суруйааччыларын уонна олохтоох автордар кинигэлэрин хасыһан ааҕар. Дьиэтигэр кэргэнэ Дария Степановналыын «Эҥсиэлини», «Кыымы», «Саха сирин», «Аар тайҕаны» суруйтаран ааҕаллар.
Январь Николаевич биир үтүө дьарыга — хаалыктаах хаамыы. Быйыл 80-с хаарын да ууллардар сатыы сылдьарын ордорор, Намҥа рюкзагын сүктэ да бородуукталыы, аптекаҕа кыһыннары хаалыктаах хааман тиийтэлиир.
Кыайыы күнүн көрсө фронтовик аҕатын туһунан кэпсиир:
— Аҕабыт Протопопов Николай Никифорович 1917 сыллаахха Салбаҥҥа төрөөбүтэ. Аҕа дойду көмүскэлигэр 1942 сыл бэс ыйын 26 күнүгэр ыҥырыллан барбыт. Ол гынан баран, улаханнык ыалдьан төннөн кэлбит. Онтон 1944 сыллаахха эмиэ бэс ыйыгар хаттаан ыҥырбыттар. Ол баран Япония сэриитигэр сылдьыбыт уонна 1946 сыллаахха эргиллибит. Аҕабыт «За Победу над Японией» мэтээл, «Орден Отечественной войны II ст.» наҕараадалардаах.
Эйэлээх кэмҥэ Хамаҕаттаҕа наар тутууга үлэлээбитэ, «Саха АССР Үтүөлээх тутааччыта» бочуоттаах ааты ылбыта. 2003 сыллаахха олохтон туораабыта.
Кыайыы күнэ — саамай ытыктанар бырааһынньык, дьоммутун кэриэстиибит, махтанабыт!
Мария Винокурова