Бүгүн Нам улууһугар, алтынньы 17 күнүгэр, М.К. Аммосов аатынан култуура уонна духуобунай сайдыы дыбарыаһыгар «Биир санаанан – биир сомоҕо» акция буола турар.
Акция ийэ дойдубутун көмүскээн байыаннай дьайыыга сылдьар биир дойдулаахтарбытыгар күүс-көмө, өйөбүл буолар, туттар мал-сал, сылаас таҥас-сап, көмүскэнэр тэриллэри о.д.а. наадалааҕы атыылаһан тириэрдэр сыаллаах буола турар.
Дыбарыаска тэрилтэлэр коллективтара, түмсүүлэр, биирдиилээн дьон анал уурунаҕа бэйэлэрин көмө үптэрин кэлэн угаллар. Итиэннэ, атыы-эргиэн дьаарбаҥкатыгар Партизан орто, Модут агрооскуолалара, «Түөлбэ» оҕо киинэ, «Уран саргы» норуот идэтин маҕаһыына, «Айар» кинигэ кыһата, урбаанньыттар биир санааҕа холбоһон кыттыыны ылаллар, көмөҕө кыттыһаллар.
«Байыаннай дьайыыга сылдьар байыастарбытыгар көмө акцияҕа кытта сылдьабыт. Кииммит иһинэн үлэлиир бизнес-инкубатор оҕолорун оҥоһуктарын, бэйэлэрэ тикпит араас малларын, куруолук оҕолорун атыыга аҕаллыбыт.
Биһиги коллектив биир күүннээх хамнаспытын, 44431 солк. көмөҕө анаатыбыт. Маннык акцияҕа куруутун кыттабыт, биир санаанан күүс-көмө буолабыт. Хомойуох иһин, коллегабыт, харабылбыт, элбэх оҕолоох аҕа байыаннай дьайыыга бэйэтин баҕатынан Ийэ дойдутун көмүскүү сылдьан сырдык тыынын толук уурбута олус хомолтолоох. Куруутун сибээстэһэ уонна көмөлөһө сылдьыбыппыт. Бу күһүн дьиэ кэргэнигэр бэйэбит бааһынабытыттан биир куул хортуоппуй уонна хаппыыста көмө оҥордубут.
Байыаннай дьайыыга сылдьар биир дойдулаахтарбытыгар бары турунаммыт күүс, өйөбүл буолуохха, үтүө дьыалаҕа кыттыһыахха», — диэн «Түөлбэ» оҕо киинин директора Надежда Дьячковская санаатын үллэһиннэ.
Кыайыыны уһансарга «Эрэл» ТХПК куруутун күүс-көмө буолар. Үүттэн оҥорон таһаарар бородууксуйаларыттан, эт аһын-үөлүн, оҕуруот аһын утары ууналлар.
«Биһиги коллектив байыаннай дьайыыга сылдьар буойуттарбытыгар анаан, бүгүн тэриллибит акцияҕа биир сомоҕо буолан 30 тыһ. сууманы туттардыбыт. Дойдубутун көмүскүү сылдьар уолаттарбытыгар күүс-көмө буолуо диэн эрэнэбит», — диэн «Эрэл» ТХПК үлэһитэ Уруйдаан Прокопьев санаатын тириэртэ.
Киэһэ 6 чаастан М.К. Аммосов аатынан култуура уонна духуобунай сайдыы дыбарыаһыгар акция-кэнсиэр буолуоҕа. Киирии билиэт сыната 300 солк. Манна киирбит үп биир дойдулаах байыастарбытыгар ананыаҕа.
Семен Аргунов