Муус устар 4 күнүгэр Кыһыл Дэриэбинэ «Сайдыы» сынньалаҥ киинигэр, дириэктэр Айталина Винокурова, Россияҕа Дьиэ кэргэн, Саха сиригэр Оҕо саас, Нам улууһугар Оҕо спорда, Хатыҥ Арыы нэһилиэгэр Доруобуйа уонна физическай култуура сылларыгар аналлаах нэһилиэк түөлбэлэрин икки ардыларыгар «Күндү күлүүктэр» тэттик сценка күрэҕэ ыытылынна.
Күрэҕи «Сайдыы» СК тэрийэн ыытта. Күрэххэ сэттэ түөлбэттэн түөрт түөлбэ бэлэмнэнэн кэлэн кытынна. Дьүүллүүр сүбэҕэ олохтоох дьаһалта сүрүннүүр исписэлииһэ Надежда Сивцева, Граф Биэрэгин «Ромашка» оҕо уһуйаанын иитээччитэ Евдокия Уваровская, Кыһыл Дэриэбинэ «Мичээр» оҕо уһуйаанын сэбиэдиссэйэ Мария Кривошапкина үлэлээтилэр. Кыттааччыллар саалаҕа мустубут көрөөччүлэргэ, сааскы маҥҥайгы таммахтар курдук, ыраас, киһи сүргэтин көтөҕөр, күллэрэр бииртэн биир көрүдьүөс тэттик сценкалары көрдөрдүлэр.
Түмүккэ «Күндү күлүүк-2024» анал ааты Кыһыл Дэриэбинэттэн «Сандаара» түөлбэ (сал.Платонова А.Р.) «Полицейскай куобах» сценканан, «Бэртээхэй бэтиэхэ» анал ааты Аппааныттан «Саһарҕа» түөлбэ (сал. Максимова Л.Д.) «Булчуттар» сценканан, «Көрүдьүөһү күөдьүтээччи» анал ааты Аппааныттан «Виктория» түөлбэ (сал.Максимова Т.М.) «Ыстапаан» сценканан, «Тэбэнэттээх күлүү» анал ааты Граф Биэрэгиттэн «Восход» түөлбэ (сал. Алексеева А.Б.) «Графские бабки» сценканан ыллылар.
Бары түөлбэлэр бэлэмнэнэн, оҥостон кэлбиттэр. Маннык түөлбэ иһинэн ыытыллар араас тэрээһиннэр олохтоохтору түмэллэр уонна өссө саҥа сүүрээннэри , тыыны киллэрэллэр.
Надежда Сивцева