Ньургун Тимофеев аатынан өрөспүүбүлүкэтээҕи Олимпийскай эрэл спорт оскуолатын салалтата Норуоттар икки ардыларынааҕы VIII-с төгүлүн ыытыллыбыт “Азия оҕолоро” оонньууга стендовай ытыы көрүҥэр ситиһиилээхтик кыттыбыт иитиллээччилэрин чиэстээтэ.
“Азия оҕолоро” оонньууттан кыайыы үктэллэммит оҕолору чиэстиир тэрээһиҥҥэ үөрүү эйгэтигэр төрөппүттэр, тренердэр, спортсменнар, ыалдьааччылар мустан эҕэрдэлээтилэр.
Эдэр спортсменнар стендовай ытыы тыҥааһыннаах, долгутуулаах күрэхтэһиитигэр күүстэрин, санааларын бүтүннүү түмэннэр, маастарыстыбаларын көрдөрөннөр сыалларын таба ыппыттара этиллэр.
Оҕолор норуоттар икки ардыларынааҕы спорт күрэхтэһиититтэн барыта 16 мэтээли ситиһэннэр, бар дьонноругар өйгө хаалар түгэни, үтүө өйдөбүлү бэлэхтээтилэр. Ол курдук, эдэр спортсменнар 5 кыһыл, 5 үрүҥ уонна 6 боруонса мэтээллэри ситиспиттэр.
Харысхан Попов