Күүстээх санаа, көхтөөх, уһун олох ыҥырыытынан

Доруобуйаларынан хааччахтаах дьон олоххо тардыһыылара күүһүрэригэр СӨ үлэҕэ министерствота уонна СӨ спорка министерствота эти-сиини хамсатар тэрээһиннэри оҥорор. Доруобуйаларынан хааччахтаах аҕам саастаахтар балаҕан ыйын 10 күнүгэр “Дохсун” спорт комплекска спартакиадаҕа күрэхтэстилэр.

Бэйэ туһугар уонна хамаанданан күрэхтэһиигэ барыта 37 киһи көмөтүгэр наадыйааччы Капитоновка, Нам өрөспүүбүлүкэтээҕи кырдьаҕастар уонна инбэлииттэр дьиэлэриттэн кыттыыны ылбыттарын Т.К. Ядрихинская аатынан Намнааҕы социальнай-геронтологическай киин дириэктэрэ Инна Сивцева этэр.

Күрэхтэһээччилэр дуобакка, саахымакка, остуол тенниһигэр, бильярдка, дартска, “Ат сүүрдүүтэ” саха төрүт оонньуутугар уонна бэһиэлэй старка күрэхтэһэннэр бириэмэлэрин туһалаахтык атаарбыттар.

Намҥа Өрөспүүбүлүкэтээҕи кырдьаҕастар уонна инбэлииттэр интернат-дьиэтин олохтохтоохторо спартакиадаттан мэтээл, грамота ыланнар бэйэлэрэ да, ыалдьааччыларын да үөрүүлэрэ үгүс. Ол курдук, Охотин Анатолий Константинович саахымакка кыһыл көмүс мэтээлинэн; киһини интэриэһиргэтэр “Ат сүүрдүүтэ” оонньууга хараҕынан мөлтөх Кириллин Афанасий Афанасьевич тэҥнээҕин булбатакка сымса, түргэн илиилээҕинэн ааттаммыт. Үрүҥ көмүс мэтээллээхтэр, дуобакка – Протопопов Егор Егорович, бильярдка – Колосов Сергей Александрович, остуол тенниһигэр – Чемезова Анастасия Титовна буолаллар. Спартакиада 7 көрүҥ түмүгүнэн, көһө сылдьар Кубок Өрөспүүбүлүкэтээҕи кырдьаҕастар уонна инбэлииттэр интернат-дьиэтин кэллэ.

“Спартакиада кыттааччылара – аҕам саастаахтар уонна араас бөлөххө арахсар инбэлииттэр. Хас биирдии көрүҥҥэ күүһүн толору уурбут күрэхтэһээччи киирсэрин көрөр олус долгутуулаах, тыҥааһыннаах этэ.

Спартакиада кэмигэр аҕам саастаахтар күрэхтэһиини эрэ өрө туппакка бэйэ-бэйэлэрин кытта билсэллэр, кэпсэтэллэр. Күрэхтэһии түһүмэхтэрин икки ардыгар, сынньалаҥҥа аҕам саастаахтарбыт ырыаны, үҥкүүнү көҕүлүттэн туппуттара. Көмөҕө наадыйар дьоммут маннык ыытыллар тэрээһиннэртэн өйдөрүгэр-санааларыгар умнуллубат түгэн хааларыгар, олохторо тупсарыгар санааларын күүһүрдэллэригэр саарбахтаабаппын.

Биһиги махтаныахпыт этэ, күүс-көмө буолбут спонсордарбытыгар, Нам улууһун урбаанньыттарыгар Изюков Александр Григорьевичка, Попова Людмила Петровнаҕа. Кинилэр көмөлөрүнэн, күрэхтэһии бириистэрэ турдулар.

Спартакиаданы эһиил эмиэ инбэлииттэр декадалара чэрчитинэн, үгүс интернат-дьиэлэри ыҥыран ыытарга быһаарыы ылылынна”, – диир Инна Иннокентьевна.

Харысхан Попов

Читайте дальше