Модут орто агрооскуолатын директора Иван Тихоновы кытта телефонунан кэпсэттим. Оскуолаларын тутуутун хаамыытын туһунан туоһуластым.
—Оскуолабыт тутуутун үлэтэ-хамнаһа улахана бүтэн, ититиитэ холбонон, ааспыт улахан тымныылары тулуйан, сылааһынан илгийэн үлэлииргэ-хамсыырга үчүгэй. Онон санаабыт көнньүөрэн, киэҥ-куоҥ, толору хааччыллыылаах, сырдык оскуолабытыгар киирээри үлэлии сылдьабыт.
Сотору-сотору нэһилиэк дьоно-сэргэтэ субуотунньуктарга тахсаллар. Биһиги, оскуола бары үлэһиттэрэ, бу күннэргэ хомуйуу, сууйуу-сотуу үлэтигэр сылдьабыт. Бөх-сах тиэйиитигэр эр дьон субуотунньукка тахсыахпыт. Нэһилиэк тэрилтэлэрэ, түөлбэлэрэ олбук-солбук тахсыахтаахтар. Тутааччылар 25 киһи араас хайысханан үлэлии сылдьаллар. Атын да оскуолалар коллективтара, туора турбакка, көмөлөһө кэлэр баҕаларын биллэрбиттэрэ. «Норуот күүһэ – көмүөл күүһэ» диэн бэргэн этии мээнэҕэ этиллибэтэҕэ чахчы, күүспүтүн-уохпутун, өйбүтүн-санаабытын холбоотохпутуна, күүтүүлээх оскуолабытын бүтэрэн-оһорон, саҥа сылга саҥалыы күүһү-уоҕу ылан үлэлиэх этибит. Оҕолорбут аныгы тутуулаах, ыраас, сылаас, сырдык оскуолаҕа киэҥ билиини сомсо үөрэ-көтө үөрэниэ этилэр, – диэнинэн Иван Павлович кэпсээнин түмүктээтэ, эрэлин биллэрдэ.
Т. НИКОЛЬСКАЯ.