Туймаада туонатыгар кулун тутар 13-15 күннэригэр саха тылын уонна литературатын учууталларыгар республикатааҕы күрэс ыытылынна. 2024 сыл бастыҥын быһаарар тэрээһини Үөрэҕи сайыннарар, идэ таһымын үрдэтэр институт үлэһиттэрэ ыыттылар.
Саха тылын учууталларын республикатааҕы күрэхтэһиитэ быйыл 3 төгүлүн ыытыллар, манна улуустартан 13 уһуйааччы кэлэн маастарыстыбатын көрдөрдөрдө.
Күрэскэ учууталлар аһаҕас уруоктары биэрдилэр. А.И. Софронов — Алампа сиэр-майгы туһунан “Дьүһүн кубулуйумтуо” кэпсээнинэн аһаҕас уруогу — кэбиһиилээх от күрүөтүн муоһунан талкыйан, тоҕо анньан айдааны тардыбыт атыыр оҕус кимиэнэ буоларын Тэмэлдьигэн Миитэрэй эрэ ыраҥалаабат Айыы Кыһатын оскуолатын 5 кылаас оҕолоро эмиэ көхтөөхтүк ырыталларын көрдөрдүлэр.
Үһүс түһүмэххэ учууталлар үөрэтэр, такайар суолларын-иистэрин, айар мастырыскыайдарын арыйан кэпсээтилэр. Төрүт культураны баһылаабыт учуутал оҕоҕо норуот ырыатын, тойугун иҥэрэр эбит буоллаҕына, атын учуутал уус-уран ааҕыыны тэрийэн театр нөҥүө оҕолору сайаҕастык саҥардар эбит.
Ол курдук, Наммыт улууһун И.С. Гаврильев аатынан Намнааҕы 1 нүөмэрдээх орто оскуола саха тылын учуутала Лариса Дмитриевна Данилова чиэстээхтик көмүскээтэ, кини бу оскуолаҕа 5 сылын үлэлиир, ыытар дьарыгар 61 алын кылаас уонна улахан кылаас оҕолоро утумнаахтык дьарыктаналлар.
— Хоһоонтон саҕалаан инцинировкалары туруорабыт, айымньы ис хоһоонугар, дьоруойдарыгар болҕомтону уурабыт, айымньыны сиһилии ааҕан, хас биирдии тыл суолтатын өйдөөн, сыанаҕа тутта-хапта сылдьалларын ситиһэн биһигини бэйэбитин үөрдэллэр.
Наммыт улууһун И. С. Гаврильев аатынан 1-кы №-дээх орто оскуола саха тылын уонна литературатын учуутала Лариса Данилова «Сыл бастыҥ учуутала — 2024″ аатын ылыан ылла.
Салгыы, кыайыылаах уһуйааччы Татарстаҥҥа Казань куоракка бүтүн Арассыыйатааҕы көрүүгэ Саха сириттэн чиэстээхтик кыттыаҕа.
Лена Корякина